Քաղաքականություն
05.02.2025 | 12:52
Դոնալդ Թրամփի վարչակազմը կշռադատում է գործադիր գործողությունները ԱՄՆ կրթության դեպարտամենտը լուծարելու համար՝ որպես Իլոն Մասկի գլխավորած կառավարության արդյունավետության դեպարտամենտի (Doge) կողմից դաշնային ծախսերը վերահսկելու և պետական աշխատողների թիվը կրճատելու ջանքերի մաս։ Այս մասին հայտնում է Wall Street Journal-ը, որին վկայակոչում է The Guardian-ը։
Ըստ լրատվամիջոցի աղբյուրների՝ ԱՄՆ պաշտոնյաները քննարկել են գործադիր հրամանը, որը կդադարեցնի կրթության դեպարտամենտի բոլոր գործառույթները, որոնք հստակորեն գրված չեն կանոնադրության մեջ, կամ որոշ գործառույթներ կտեղափոխվեն այլ գերատեսչություններ։
Հրամանագիրը կոչ է անելու մշակել օրենսդրական առաջարկ՝ գերատեսչությունը վերացնելու համար։ Նշվում է, որ Դոնալդ Թրամփի խորհրդականները դեռևս քննարկում են նման հրամանի առանձնահատկությունները և ժամկետները:
Միևնույն ժամանակ, կրթության դեպարտամենտի տասնյակ աշխատակիցների ուրբաթ ասել են, որ նրանց արձակուրդի են ուղարկել, առնվազն 55 աշխատակից կորցրել է պետական էլեկտրոնային փոստի մուտքի հասանելիությունը, նրանց ասվել է գրասենյակ չներկայանալ, հաղորդում է Associated Press-ը: Ըստ արհմիության՝ աշխատակիցներին ուղարկված էլեկտրոնային նամակներում ասվում է, որ նրանք վճարովի վարչական արձակուրդի են ուղարկվում Թրամփի գործադիր հրամանի համաձայն, որն արգելում է բազմազանությունը, հավասարությունը և ներառման ծրագրերը դաշնային կառավարությունում:
WSJ-ը հայտնում է, որ մինչ Թրամփը հունվարին կստանձներ նախագահի պաշտոնը, անցումային թիմը գործադիր հրաման էր մշակել, որը պետք է հանձնարարեր կրթության դեպարտամենտի ղեկավարին սկսել գերատեսչության լուծարումը և Կոնգրեսին կոչ աներ հավանություն տալ նման ջանքերին։
Կրթության քարտուղարի պաշտոնում Թրամփի ընտրությունը՝ WWE-ի նախկին գործադիր տնօրեն Լինդա Մաքմահոնը, դեռևս սպասում է Սենատի հաստատմանը: Վարչակազմի որոշ պաշտոնյաներ կարծում են, որ գործադիր հրամանը պետք է սպասի մինչև Մաքմահոնի Սենատի հաստատման լսումները, որը դեռ նախատեսված չէ:
Իր նախընտրական արշավի ընթացքում Թրամփը խոստացել էր վերացնել Կրթության դեպարտամենտը, որը, ըստ նրա, լցված է «արմատականներով, ֆանատիկներով ու մարքսիստներով», և նահագներին տալ կրթությունը վերահսկելու լիարժեք լիազորություն։
ԱՄՆ նախագահը չի կարող միանձնյա կազմաքանդել գերատեսչությունը, քանի որ Կոնգրեսը պետք է հաստատի գործակալության ստեղծումը կամ վերացումը։ Սակայն Թրամփի պաշտոնյաները կարող են փոխել դեպարտամենտի բյուջեի և քաղաքականության առանցքային մասերը կամ կրկնել այն մոտեցումը, որը որդեգրել են ԱՄՆ Միջազգային զարգացման գործակալության (USAID) պարագայում։
Վերջին օրերին Մասկի Doge-ի ներկայացուցիչները հեռացրել են USAID-ի բարձրաստիճան աշխատակիցներին, փակել կայքէջը, արգելափակել են աշխատակիցների մուտքը Վաշինգտոնի գրասենյակ:
Երկուշաբթի Doge-ի թիմն աշխատել է Կրթության դեպարտամենտում՝ իրականացնելու Թրամփի գործադիր հրամաններն ու օրակարգը։
Թարգմանությունը՝ Էմմա Չոբանյանի
