08.09.2026 | 23:30
Պապիկյանը այցելել է ՊՆ ուսումնական կենտրոն, հրամկազմին տրվել են մի շարք հանձնարարականներ
Եթե մենք ՆԱՏՕ-ում չլինենք, մեզ միջուկային զենք տվեք․ Զելենսկի
Քաղաքականություն
05.02.2025 | 16:47
Արևմտյան գործընկերները պետք է Ուկրաինային միջուկային զենք տրամադրեն, եթե հրաժարվեն երկիրն ընդունել ՆԱՏՕ-ի կազմ, հայտարարել է Ուկրաինայի նախագահ Վլադիմիր Զելենսկին բրիտանացի լրագրող Պիրս Մորգանին տված հարցազրույցում։ Զրույցից հատվածներ Մորգանը հրապարակել է X-ի էջում։
Ուկրաինայի ղեկավարիխոսքով՝ Կիևին միջուկային զենք փոխանցելը կարող է ծառայել որպես Ուկրաինայի անվտանգության բավարար երաշխիք և հետ պահել Ռուսաստանի նախագահ Վլադիմիր Պուտինին նոր հարձակումից։
Զելենսկին խոստովանել է, որ ՆԱՏՕ-ին Ուկրաինայի անդամակցությունը կարող է հետաձգվել «տարիներով կամ տասնամյակներով»։ Այս առումով «միանգամայն արդարացի հարց է առաջանում՝ ի՞նչը կպաշտպանի մեզ այս չարիքից այս ամբողջ ընթացքում, այս ամբողջ ճանապարհին», հռետորական հարց է հնչեցրել Ուկրաինայի նախագահը։
«Աջակցության ի՞նչ փաթեթ, ի՞նչ հրթիռներ։ Մեզ միջուկային զենք կտա՞ն։ Այդ դեպքում թող տան միջուկային զենք»,- շարունակել է նա։
Վլադիմիր Զելենսկիի խոսքով՝ արևմտյան երկրները կարող են օգնել Ուկրաինային՝ ֆինանսավորելով «միլիոնանոց բանակը» և իրենց զորքերը տեղակայելով երկրում։
«Ձեր զորախմբերը տեղակայեք մեր պետության այն հատվածներում, որտեղ մենք ցանկանում ենք կայունություն ունենալ, որպեսզի մարդիկ հանգիստ լինեն։ Եթե Ուկրաինան չմիանա ՆԱՏՕ-ին, ապա Պուտինը, որն իր ներխուժումն արդարացնելու համար օգտագործել է Կիևի հնարավոր անդամակցությունը դաշինքին, պետք է ամբողջությամբ դուրս գա մեր տարածքից»,- հայտարարել է Զելենսկին։
Թարգմանությունը՝ Տաթև Ֆռանգյանի
