Քաղաքականություն
04.02.2025 | 22:47
Թուրքիայի և Ադրբեջանի նախագահներ Ռեջեփ Թայիփ Էրդողանն ու Իլհամ Ալիևը կարող են մասնակցել թուրքական Քահրամանմարաշ քաղաքում «Ադրբեջան» բնակելի թաղամասի բացման արարողությանը։ Այս մասին ադրբեջանական Report գործակալությանն ասել է Քահրամանմարաշի նահանգապետ Մուքերեմ Ունլուերը։
Նրա խոսքով՝ այս քայլը կդառնա երկու պետությունների և ժողովուրդների բարեկամության ևս մեկ խորհրդանիշ։ Ունլուերը հիշեցրել է, որ երկու երկրների ղեկավարները տեսակապով մասնակցել են նաև բնակելի թաղամասի հիմնարկեքի արարողությանը։
«Այնպիսի հրաշալի գործ, ինչպիսին ադրբեջանական թաղամասն է, իրավամբ պետք է բացվի երկու ժողովուրդների ղեկավարների կողմից»,- ասել է նահանգապետը։
Ըստ նրա՝ բնակելի թաղամասը կառուցվում է Ադրբեջանի կառավարության աջակցությամբ նրանց համար, ում տներն ավերվել են 2023 թվականի փետրվարին տեղի ունեցած երկրաշարժից։
««Ադրբեջան» բնակելի թաղամասում մի քանի շենքերի շինարարության հիմնական փուլն արդեն ավարտվել է, առաջիկա մի քանի ամիսների ընթացքում քաղաքացիները կկարողանան տեղափոխվել նոր տներ»,- ասել է նա։
Հավելենք, որ այս նախագծի իրականացման համար Ադրբեջանի կառավարությունը 100 մլն դոլար է հատկացրել։ «Ադրբեջան» բնակելի թաղամասի ընդհանուր մակերեսը կկազմի 32 հա։ Անցյալ տարվա սեպտեմբերին թաղամասում տեղի է ունեցել նաև Հեյդար Ալիևի անվան տարրական դպրոցի բացման արարողությունը։
Թարգմանությունը՝ Էմմա Չոբանյանի
