17.07.2026 | 23:30
ԲԸՏՄ-ում քննարկվել են COP17-ի նախապատրաստական աշխատանքներն ու տեսչության մասնակցությունը
ԵՄ-ն կօգնի Մոլդովային հասնել էներգետիկ անկախության
Քաղաքականություն
04.02.2025 | 17:44
Եվրոպական հանձնաժողովը և Քիշնևի իշխանությունները համաձայնության են եկել Մոլդովայի էներգետիկ անկախության և կայունության համապարփակ ռազմավարության շուրջ։ Երկամյա ծրագիրն ունի երկակի նպատակ՝ ազատել Մոլդովային ռուսական անվստահելի էներգառեսուրսներից և այն ամբողջությամբ ինտեգրել ԵՄ էներգետիկ շուկայում, հայտարարել է Եվրահանձնաժողովը, փոխանցում է DW-ի ռուսական ծառայությունը։
Այս համաձայնագրի շրջանակում Մոլդովան այս տարի կստանա 250 միլիոն եվրո, որից 100 միլիոնը՝ ապրիլի կեսերին։ Բացի այդ գումարից՝ Բրյուսելը 60 միլիոն եվրո կտրամադրի Մերձդնեստրի բնակիչներին՝ «առանձին պայմանների պահպանման դեպքում» աջակցելու մարդու իրավունքների ոլորտում անհրաժեշտ միջոցների ընդունմանը։
Հաղորդագրության համաձայն՝ կարճաժամկետ կտրվածքով փաթեթը կաջակցի մոլդովացի սպառողներին, որոնք տուժում են կտրուկ թանկացումներից և կփոխհատուցի էլեկտրաէներգիայի ավելցուկային ծախսերը բոլոր տնային տնտեսությունների համար՝ ամսական մինչև 100 կՎտ/ժ չափով մինչև 2025 թվականի դեկտեմբերի 31-ը։
Բացի այդ, կփոխհատուցվի սոցիալական հաստատությունների, այդ թվում՝ մանկապարտեզների, դպրոցների, հիվանդանոցների էլեկտրաէներգիայի լրացուցիչ ծախսերի ամբողջ գումարը։
Երկարաժամկետ հեռանկարում ԵՄ աջակցությունը Մոլդովային հնարավորություն կտա բարելավել իր էներգետիկ անվտանգությունը ներդրումների և բարեփոխումների միջոցով, որոնք ուղղված են վերականգնվող էներգիայի աղբյուրներին անցնելուն, ինչպես նաև ապահովելու ռուսական էներգակիրներից ամբողջական անցում:
Հիշեցնենք, որ տարեսկզբից Մերձդնեստրի բնակիչները ստիպված են մասամբ մնալ առանց ջեռուցման, գազի և տաք ջրի։
Մինչև 2025 թվականի հունվարի 1-ը տարածաշրջանը գազ էր ստանում Ռուսաստանից Ուկրաինայով անցնող խողովակաշարով։ Տարեսկզբին Մոսկվայի և Կիևի միջև գազի տարանցման պայմանագրի ժամկետը լրանալուց հետո ռուսական «Գազպրոմը» դադարեցրել է գազի մատակարարումը։
Թարգմանությունը՝ Տաթև Ֆռանգյանի
