ՌԴ-ն և Իրանը մինչև մարտ կստորագրեն Ռեշտ-Աստարա երկաթուղու կառուցման մասին համաձայնագիրը

Ռուսաստանի և Իրանի տրանսպորտի նախարարները պայմանավորվել են մինչև այս տարվա մարտ համաձայնագիր ստորագրել Ռեշտ-Աստարա հատվածում «Հյուսիս-Հարավ» միջազգային տրանսպորտային միջանցքի շրջանակում երկաթուղու կառուցման մասին, լրագրողներին հայտնել է Մոսկվայում Իրանի դեսպան Քազեմ Ջալալին, գրում է ՏԱՍՍ-ը։

«Ռուսաստանի տրանսպորտի նախարարը և նրա իրանցի գործընկերը վերջին երեք ամիսների ընթացքում մի քանի անգամ խորհրդակցություններ են անցկացրել այս նախագծի վերաբերյալ։ Նրանք պայմանավորվել են մինչև այս տարվա մարտ պայմանագիր կնքել այս նախագծի իրականացման վերաբերյալ, և մենք հույս ունենք, որ այս տարի մենք կկարողանանք առաջին քայլերն անել դրա իրականացման ուղղությամբ»,- ասել է իրանցի դիվանագետը։

Դեսպանը նշել է, որ «Իրանի և Ռուսաստանի փոխգործակցությունը հաջողությամբ զարգանում է բոլոր ոլորտներում», և որ «Հյուսիս-Հարավ» տրանսպորտային միջանցքի ստեղծումը մեգանախագիծ է երկկողմ համագործակցության շրջանակում։ Նրա խոսքով՝ այս նախագծի իրականացումը, ընդհանուր առմամբ, բավականին հաջող է ընթանում, և հիմա «ամենակարևոր խնդիրը Ռեշտ-Աստարա հատվածում երկաթուղու կառուցումն է»։

Ջալալին նաև հայտնել է, որ Ռուսաստանը, Իրանն ու Ադրբեջանը կքննարկեն Ռեշտ-Աստարա երկաթուղային գծի կառուցման ընթացքը։

«Առաջիկայում մենք նախատեսում ենք եռակողմ հանդիպում անցկացնել Իրանի, Ռուսաստանի և Ադրբեջանի արտգործնախարարների, տրանսպորտի, էներգետիկայի նախարարների և մաքսային ծառայությունների ղեկավարների մասնակցությամբ»,- ասել է Իրանի դեսպանը։

Թարգմանությունը՝ Էմմա Չոբանյանի