Կրեմլը չի ​​մեկնաբանում Ուկրաինայում հակամարտության կարգավորման առաջընթացի մասին Թրամփի խոսքերը

ՌԴ նախագահի մամուլի քարտուղար Դմիտրի Պեսկովը հայտարարել է, որ ռուսական կողմն Ուկրաինայում հակամարտության կարգավորման հարցով ավելացնելու ոչինչ չունի։ Նա այսպես է մեկնաբանել ԱՄՆ նախագահ Դոնալդ Թրամփի հայտարարությունը, թե այս ուղղությամբ «մեծ առաջընթաց» է գրանցվել, փոխանցում է Կոմերսանտը։

«Մենք ոչինչ չունենք ավելացնելու այն ամենին, ինչ նախկինում բազմիցս ասել ենք այս թեմայով»,- ասել է Պեսկովը լրագրողներին։

Նա նշել է, որ Կրեմլը դեռևս հստակ չգիտի, թե ինչպես է ԱՄՆ նախագահը նախատեսում օգնել՝ լուծելու հակամարտությունը, «այդ պատճառով դժվար է որևէ գնահատական տալ»։

Մամուլի հետ զրույցում Կրեմլի ներկայացուցչին խնդրել են մեկնաբանել Դոնալդ Թրամփի հայտարարությունը, որում ասվում էր, որ Միացյալ Նահանգները պատրաստ է օգնել Ուկրաինային, եթե Կիևը Վաշինգտոնին տրամադրի իր հազվագյուտ հողային ռեսուրսների հասանելիությունը։

«Սա, կոպիտ ասած, օգնություն գնելու առաջարկ է։ Այսինքն՝ ոչ թե շարունակել անվճար տրամադրել, այլ կոմերցիոն հիմունքներով տրամադրել։ Ավելի լավ կլիներ, իհարկե, ընդհանրապես օգնություն չտրամադրել և դրանով իսկ նպաստել այս հակամարտության ավարտին»,- ասել է Դմիտրի Պեսկովը։

ԱՄՆ նախագահ Դոնալդ Թրամփն ավելի վաղ հայտարարել է, որ Ուկրաինայի հակամարտության կարգավորման հարցում զգալի առաջընթաց է գրանցվել, սակայն մանրամասներ չի հայտնել։ Սպիտակ տանը պատասխանելով լրագրողների հարցերին՝ նա նաև խոսել է Ուկրաինայի հետ գործարք կնքելու ցանկության մասին, որի շրջանակում ԱՄՆ օգնությունը կփոխանակվի «հազվագյուտ հողային մետաղների և այլ բաների հետ»:

Թարգմանություն ը՝ Տաթև Ֆռանգյանի