10.08.2026 | 10:03
4 խաղափուլից հետո երեք հայ շախմատիստ առաջատարների շարքում է. Եվրոպայի Մ20 առաջնություն
Թրամփը հրահանգել է ԱՄՆ սուվերեն բարեկցության հիմնադրամ ստեղծել և հայտարարել, որ այն կարող է գնել TikTok-ը
Քաղաքականություն
04.02.2025 | 13:52
ԱՄՆ նախագահ Դոնալդ Թրամփը գործադիր հրաման է ստորագրել հաջորդ տարվա ընթացքում սուվերեն բարեկեցության հիմնադրամ ստեղծելու մասին՝ հայտարարելով, որ այն կարող է գնել TikTok-ը, գրում է Reuters-ը։
Նշվում է, որ հրամանի տեքստը մանրամասներ չի պարունակում, այն պարզապես ուղղորդում է գանձապետարանի և առևտրի գերատեսչություններին 90 օրվա ընթացքում ներկայացնել նման հիմնադրամի ծրագիր, ներառյալ՝ «ֆինանսավորման մեխանիզմների, ներդրումային ռազմավարությունների, ֆոնդի կառուցվածքի և կառավարման մոդելի» վերաբերյալ առաջարկություններ:
Դրա ստեղծումը, ամենայն հավանականությամբ, նաև Կոնգրեսի հավանությունը կպահանջի:
«Մենք մեծ հարստություն ենք ստեղծելու հիմնադրամի համար։ Ես կարծում եմ՝ ժամանակն է, որ այս երկիրն ունենա ինքնիշխան բարեկեցության հիմնադրամ»,- ասել է Թրամփը լրագրողներին։
Սպիտակ տան պաշտոնյաները չեն նշել, թե ինչպես է հիմնադրամը գործելու կամ ֆինանսավորվելու, սակայն Թրամփը նախկինում ասել է, որ այն կարող է ֆինանսավորվել «սակագների և այլ խելացի բաների միջոցով»:
Ֆինանսների նախարար Սքոթ Բեսենթը լրագրողներին ասել է, որ հիմնադրամը կստեղծվի առաջիկա 12 ամիսների ընթացքում։
«Մենք պատրաստվում ենք դրամայնացնել ԱՄՆ-ի հաշվեկշռի ակտիվների մասը ամերիկացի ժողովրդի համար։ Մենք աշխատում ենք ակտիվներն ամերիկյան ժողովրդին հասցնելու ուղղությամբ»,- ասել է նա։
Մոտեցումներից մեկը կարող է լինել ԱՄՆ International Development Finance Corp-ը (DFC) հիմնադրամի փոխակերպելը, որը Թրամփի վարչակազմը, ըստ տեղեկությունների, քննարկում էր վերջին ամիսներին։
Թրամփի մեկ այլ անակնկալ հայտարարության համաձայն՝ հիմնադրամը կարող է գնել TikTok-ը, որի ճակատագիրն անհայտ է այն բանից հետո, երբ հունվարի 19-ին ուժի մեջ է մտել օրենքը, որը պահանջում է հարթակի չինացի սեփականատեր ByteDance-ից կա՛մ վաճառել այն ազգային անվտանգության նկատառումներով, կա՛մ այն կարգելափակվի։
Թրամփը հունվարի 20-ին պաշտոնը ստանձնելուց հետո գործադիր հրաման է ստորագրել, որով հետաձգում է այդ օրենքի կիրառումը 75 օրով: ԱՄՆ նախագահն ասել է, որ բանակցություններ է վարում բազմաթիվ մարդկանց հետ TikTok-ի գնման շուրջ և, հավանաբար, փետրվարին որոշում կկայացնի հավելվածի ապագայի վերաբերյալ: Այն 170 միլիոն ամերիկացի օգտատեր ունի։
Թարգմանությունը՝ Էմմա Չոբանյանի
