Էրդողանը մինչև Ռամադան կարող է Դամասկոս այցելել

Սիրիայում դեկտեմբերի 8-ի իշխանափոխություն իրականացրած ուժերի առաջնորդ Ահմադ ալ-Շարաան, որը երկրի անցումային շրջանի նախագահ է նշանակվել, Թուրքիայի նախագահ Ռեջեփ Թայիփ Էրդողանի հրավերով այսօր այց է կատարում Անկարա։ Turkiye-ն հայտնում է, որ 2011 թվականից ի վեր Սիրիայի նախագահի առաջին այցի շրջանակում մի շարք կարևոր համաձայնագրեր են ստորագրվելու։

Լրատվամիջոցն ընդգծում է, որ ինչպես Ադրբեջանի դեպքում, այնպես էլ Թուրքիա-Սիրիա հարաբերություններում կհասնեն «երկու ազգ, մեկ պետություն» հարթության։

Ըստ լրատվամիջոցի տեղեկությունների՝ Շարաայի օրակարգը ներառում են PKK-ն, ԻԼԻՊՇ-ը և իսրայելական օկուպացիան, ինչպես նաև նոր սահմանադրության, քաղաքական և տնտեսական կայունության, երկրի վերակառուցման, բանակի և ոստիկանության կառուցվածքի կառուցման, ազգային ամբողջականության, ծովային, ցամաքային և օդային փոխադրումների և կապի, կրթության, գյուղատնտեսության և պաշտպանական-անվտանգության նոր դոկտրինի ձևավորման հարցեր։

Ակնկալվում է, որ երկու ղեկավարների հանդիպման ընթացքում մի շարք կարևոր պայմանագրեր կստորագրվեն։

Նշվում է, որ Շարաայի վարչակազմը պատրաստել է 100 միլիարդ դոլար արժողությամբ արտակարգ իրավիճակների գործողությունների ծրագիր: Երկրորդ փուլը ներառում է 300 միլիարդ դոլար արժողությամբ վերակառուցման թղթապանակ, որը վերաբերում է երկրի վերականգնմանը և այնպիսի կարիքների լուծմանը, ինչպիսիք են նվազագույն պաշտպանությունը, անվտանգությունը, բանակը և հասարակական կարգը:

Ըստ լրատվամիջոցին հասած բացառիկ տեղեկությունների՝ Շարաան պաշտոնապես Էրդողանին կհրավիրի Դամասկոս։ Նշվում է, որ Էրդողանը պատասխան այց կկատարի մինչև Ռամադան։

Հավելենք, որ մահմեդականների համար սուրբ համարվող Ռամադանն այս տարի մեկնարկում է փետրվարի 28-ին և տևելու է մինչև մարտի 29-ը։

Թարգմանությունը՝ Էմմա Չոբանյանի