Թրամփը վերսկսել է զենքի մատակարարումներն Ուկրաինային

Կարճ դադարից հետո ԱՄՆ-ը կրկին սկսել է զենք մատակարարել Ուկրաինային։ Կիևին օգնության վերսկսումը տեղի է ունեցել փետրվարի սկզբին, Reuters-ին հայտնել են իրավիճակին ծանոթ աղբյուրներ:

Նրանց խոսքով՝ նախագահ Դոնալդ Թրամփի վարչակազմը հրաժարվել է Ուկրաինային ամբողջ աջակցությունը դադարեցնելու նախնական գաղափարից։ Այնուամենայնիվ, Սպիտակ տան պաշտոնյաների միջև դեռևս անհամաձայնություն կա, թե որքան ռազմական օգնություն պետք է տրամադրվի ամերիկյան պաշարներից, նշել է գործակալության զրուցակիցներից մեկը։

Թրամփը սառեցրել է զենքի մատակարարումները Կիևին գործադիր հրամանով, որով դադարեցնում է ԱՄՆ-ի օգնությունն այլ երկրներին 90 օրով, The Washington Post-ին հայտնել է Կոնգրեսի աղբյուրը։

Պետքարտուղարությունը նշել է, որ հրամանագիրը հիմնականում վերաբերում է ԱՄՆ Միջազգային զարգացման գործակալությանը (USAID), որը տասնյակ միլիարդավոր դոլարներ է ուղարկել Ուկրաինա՝ որպես կառավարության բյուջետային աջակցության, մարդասիրական օգնության և զարգացման աջակցության մաս:

Պենտագոնը նշել է, որ Ուկրաինային տրամադրվող ռազմական օգնությունը չի մտնում Թրամփի հրամանագրով սահմանված սահմանափակումների տակ։ Ուկրաինայի նախագահ Վլադիմիր Զելենսկին նույնպես նշել է, որ Թրամփի հրամանը չի վերաբերում Կիևին ռազմական աջակցությանը և ազդում է միայն հումանիտար ծրագրերի վրա։ Սակայն, ըստ Reuters-ի, պարզ չէ՝ արդյո՞ք Թրամփի վարչակազմը պաշտոնապես կճանաչի Ուկրաինային զենքի մատակարարումների կասեցումը և հետագա վերսկսումը։

Թարգմանությունը՝ Տաթև Ֆռանգյանի