07.09.2026 | 23:24
Հայկական պտուղ-բանջարեղենի արտահանումը ԱՄԷ․ Պապոյանը քննարկել է ծավալների ավելացումը
Ադրբեջանական SOCAR-ը գնել է Իսրայելի մեծությամբ երկրորդ գազային հանքավայրի 10 տոկոս բաժնեմասը
Քաղաքականություն
03.02.2025 | 22:51
Ադրբեջանի պետական նավթային ընկերությունը (SOCAR) իսրայելցի գործարար Ահարոն Ֆրենկելից ձեռք է բերում երկրի՝ Միջերկրական ծովի ափին գտնվող Թամարի բնական գազի հանքավայրի 10 տոկոս բաժնետոմսերը, գրում է The Times of Israel-ը։
Գործարքի ֆինանսական մանրամասները չեն բացահայտվում։ Ադրբեջանի SOCAR պետական նավթային ընկերությունը գնել է Ֆրենկելի կողմից վերահսկվող Union Energy-ի բաժնետոմսերը: Դեռևս 2022 թվականին Ֆրենկելն Աբու Դաբիի Mubadala Petroleum ընկերությունից գնել էր Թամարի գազի հանքավայրի 11% բաժնետոմսերը մոտ 520 միլիոն դոլարով։
Թամար հանքավայրը հայտնաբերվել է 2009 թվականին, իսկ բնական գազի արդյունահանումը սկսվել է 2013 թվականին։ Իսրայելի մեծությամբ երկրորդ հանքավայրը, որը գտնվում է Միջերկրական ծովում՝ Հայֆայից մոտ 90 կիլոմետր դեպի արևմուտք, պարունակում է շուրջ 10 տրիլիոն խորանարդ ֆուտ բնական գազ:
SOCAR-ը նշել է, որ գործարքն «արտասահմանյան երկրներում ռազմավարական ակտիվներում բաժնետոմսեր ձեռք բերելու, արտադրական տարածքն ընդլայնելու նպատակով» ծրագրի մասն է:
«Համաձայնագիրը ստորագրվել է որոշակի պայմանների կատարման պայմանով, այդ թվում՝ սովորական կարգավորող և այլ հաստատումներ»,- նշել են ընկերությունից։
Ամերիկյան Chevron էներգետիկ հսկան այստեղ ունի 25% բաժնեմաս։ Մյուս գործընկերներն են Isramco-ն, Tamar Investment 2-ը, Tamar Petroleum-ը և Dor Gas-ը:
Սա SOCAR-ի՝ իսրայելական բնական գազի շուկա դուրս գալու առաջին փորձը չէ։ 2023 թվականին SOCAR-ը միացել է կոնսորցիումին, որը ներառում է բրիտանական նավթի և գազի բազմազգ ընկերությունները՝ BP-ն և NewMed Energy-ը, որպեսզի հայտ ներկայացնի բնական գազի հանքավայրերի հետազոտման և հայտնաբերման արտոնագրերի համար Իսրայելի Լևիաթան գազային հանքավայրի հարևանությամբ, որն աշխարհում խոշորագույններից մեկն է:
Լրատվամիջոցն ընդգծում է, որ Իսրայելի հետ Ադրբեջանի դաշինքը բարդանում է Իրանի հետ սահմանին նրա դիրքով, նույն աշխարհագրական դիրքով, որը նրան դարձնում է Երուսաղեմի գայթակղիչ ռազմավարական գործընկեր: Երկու երկրների հարաբերությունները վերելք են ապրել վերջին տարիներին՝ Հայաստանի հետ հակամարտության ընթացքում Ադրբեջանին Իսրայելի աջակցության ֆոնին:
Իսրայելն Ադրբեջանի զենքի առաջատար մատակարարներից է։ Իսրայելի ազգային անվտանգության գործում Ադրբեջանի ամենակարևոր ներդրումն էլ նավթն է։
Թարգմանությունը՝ Էմմա Չոբանյանի
