ՀՀ-ում հեղաշրջման ենթադրյալ փորձի հետ կապված «Արբատ» գումարտակի հիմնադիր Արմեն Սարգսյանը վիրավորվել է Մոսկվայում բնակելի համալիրում պայթյունից․ ՏԵՍԱՆՅՈՒԹ

Մոսկվայում Ավիացիոննայա փողոցում գտնվող «Ալ առագաստներ» բնակելի համալիրում պայթյուն է տեղի ունեցել։ Այս մասին հայտնում են մի շարք ռուսական տելեգրամ ալիքներ, որոնց վկայակոչում է Meduza-ն։

Ըստ Baza-ի տեղեկությունների՝ ինքնաշեն պայթուցիկ սարքը գործի է դրվել շենքի շքամուտքում։ 112 տելեգրամ ալիքն էլ նշում է, որ նռնակի պայթյուն է տեղի ունեցել։ Հաղորդվում է առնվազն հինգ տուժածի մասին։

Պայթյունի մասին հայտնել են նաև ռուսական պետական ՏԱՍՍ-ը և ՌԻԱ Նովոստին՝ վկայակոչելով արտակարգ իրավիճակների ծառայությունների իրենց  աղբյուրներին: Նրանց տեղեկություններով՝ վիրավորվել է երեք մարդ։

Baza-ն և Mash-ը հայտնում են  նաև, որ պայթյունի հետևանքով մեկ մարդ զոհվել է։ Այս տեղեկության պաշտոնական հաստատում դեռևս չկա։

Ինտերֆաքն էլ, վկայակոչելով իր աղբյուրներին, հայտնում է, որ, ըստ նախնական տեղեկությունների, բնակելի համալիրում տեղի ունեցած պայթյունի հետևանքով մահացել է Արմեն Սարգսյանը, նույն ինքը՝ Արմեն Գորլովսկին, որը գլխավորել է «Դոնեցկի բռնցքամարտի ֆեդերացիան», եղել է կամավորական գումարտակներից մեկի (խոսքը «Արբատ»-ի մասին է) հիմնադիրը։ Ըստ լրատվամիջոցի՝ պայթյունի հետևանքով վիրավորվել է 4 մարդ։

Կոմերսանտը այլ տեղեկություններ է հայտնում, ըստ որոնց,  պայթյունից զոհվել է ոչ թե Սարգսյանը, այլ նրա թիկնապահը։ Ինքը՝ Սարգսյանը, ծանր վիճակում հոսպիտալացվել է։ ՌԲԿ-ն ևս հայտնում է, որ Սարգսյանը վիրավորվել է բնակելի համալիրում տեղի ունեցած պայթյունի հետևանքով։

Հավելենք, որ Արմեն Սարգսյանը «Արբատ» (Армянский батальон) գումարտակի հիմնադիրն է, որը ստեղծվել է ռուս-ուկրաինական պատերազմի ընթացքում՝ 2022 թվականին։ «Գորլովսկի» մականունով հայտնի Արմեն Սարգսյանը հետախուզման մեջ է ուկրաինական իշխանությունների կողմից։

Հիշեցնենք, որ 2024 թվականի սեպտեմբերին Հայաստանի ազգային անվտանգության ծառայությունը (ԱԱԾ) օպերատիվ–հետախուզական միջոցառումների արդյունքում բացահայտել էր Հայաստանում իշխանությունը յուրացնելու նախապատրաստություն կատարելու փորձ: Ըստ տեղեկությունների՝ հանցավոր խմբի անդամները հեղաշրջման նախապատրաստման համար հավաքագրված անձանց տեղակայել են «Արբատ» կոչվող ռազմաբազայում, որը կապված է «Արբատ» գումարտակի հետ։

Էմմա Չոբանյան