26.04.2025 | 19:11
Գոռ Շատվերյանը՝ սամբոյի Եվրոպայի առաջնության չեմպիոն
Պետական ռեսուրսների արդար բաշխման միջոցով կարող ենք արմատախիլ անել գենդերային անհավասարության հիմնական պատճառները. Սոնա Ղազարյանը՝ ԵԽԽՎ-ում
Քաղաքականություն
31.01.2025 | 22:01
Ստրասբուրգում ընթանում են ԵԽԽՎ տարեկան նստաշրջանի առաջին մասի աշխատանքները, որոնց մասնակցում է ԵԽԽՎ-ում ՀՀ ԱԺ պատվիրակությունը: ԱԺ մամուլի ծառայության փոխանցմամբ՝ նստաշրջանում ելույթ է ունեցել ԱԺ պատվիրակության անդամ Սոնա Ղազարյանը:
«Հարգելի’ գործընկերներ,
Մեծ պատիվ է այսօր ձեր առջեւ բարձրաձայնել մի հարց, որը ե’ւ մշտապես արդիական է, ե’ւ մեր օրերում` հրատապ կարեւորություն ունի. Կանայք տնտեսության մեջ. զբաղվածություն, ձեռներեցություն եւ գենդերազգայուն բյուջետավորում: Ցանկանում եմ խորին շնորհակալություն հայտնել զեկույցի հեղինակին` գենդերային հավասարության առաջխաղացմանն ուղղված իր նվիրվածության եւ այս չափազանց կարեւոր աշխատանքի համար:
Տասնամյակների ընթացքում կանայք հսկայական առաջընթաց են գրանցել տնտեսության մեջ: Այսօր նրանք գլխավորում են կորպորացիաներ, ձեւավորում նորարարական ոլորտներ եւ ստեղծում փոփոխություն բերող ձեռնարկություններ: Սակայն չպետք է անտեսենք առկա մարտահրավերները: Համակարգային խոչընդոտները շարունակում են խաթարել կանանց լիարժեք ներգրավվածությունը: Շատերը մինչ օրս բախվում են խտրականության` աշխատանքի ընդունվելու գործընթացում, կանայք դեռեւս քիչ են ներկայացված որոշումներ կայացնող պաշտոններում եւ չունեն հավասար հնարավորություններ այնպիսի զարգացող ոլորտներում, ինչպիսին է STEM-ը:
Թեեւ ակնհայտ է, որ կանանց հզորացումը խթանում է տնտեսական աճը, շատ երկրներ դեռեւս պայքարում են աշխատավարձերի անհավասարության եւ կին ձեռներեցների համար ֆինանսական ռեսուրսների սահմանափակ հասանելիության դեմ: «Ապակե առաստաղը» գուցե ճաքեր է ստացել, բայց դեռեւս կոտրված չէ:
Այսօրվա քննարկվող զեկույցը լուծում է առաջարկում` գենդերազգայուն բյուջետավորում: Սա ոչ թե վերացական գաղափար է, այլ իրական փոփոխությունների գործիք: Պետական ռեսուրսների արդար բաշխման միջոցով մենք կարող ենք արմատախիլ անել գենդերային անհավասարության հիմնական պատճառները:
Մտածենք` ինչպե՞ս կարող են կանայք հաջողություններ գրանցել իրենց մասնագիտական կյանքում, եթե պետական բյուջեներում հաշվի չի առնվում հասանելի մանկապարտեզների, մայրության արձակուրդի եւ հմտությունների զարգացման նպատակային ծրագրերի կարեւորությունը:
Գենդերային զգայուն բյուջետավորումը ցույց է տալիս, որ ֆինանսական որոշումներն իրականում բարոյական ընտրություններ են, որոնք պետք է նպաստեն ոչ միայն առանձին անհատների բարեկեցությանը, այլեւ ամբողջ հասարակության զարգացմանը:
Ձեռնարկատիրությունը եւս առանցքային տեղ ունի այս քննարկման մեջ: Կին ձեռներեցները ոչ միայն աշխատատեղեր են ստեղծում, այլեւ վերաիմաստավորում են ոլորտները եւ խթանում նորարարությունը: Այնուամենայնիվ, այսօրվա դրությամբ վենչուրային կապիտալի միայն 2 տոկոսն է ուղղվում կանանց ղեկավարած ստարտափներին: Սա պարզապես անհավասարություն չէ, այլ բաց թողնված հնարավորություն, որը խոչընդոտում է ընդհանուր առաջընթացին:
Զեկույցը կարեւոր ճշմարտություն է արձանագրում. տնտեսությունում գենդերային հավասարության ապահովումը ոչ միայն բարոյական հրամայական է, այլեւ տնտեսական անհրաժեշտություն:
Եկե’ք խթանենք այնպիսի քաղաքականություններ, որոնք արտացոլում են կանանց իրականությունը: Եվ եկե’ք ապահովենք, որ այսօրվա յուրաքանչյուր նորածին աղջիկ մեծանա մի աշխարհում, որտեղ նրա ներուժը գնահատվում է ոչ թե` ըստ սեռի, այլ` ըստ երազանքների»,- ասել է պատգամավորը:
