21.12.2025 | 22:02
Ֆուտզալի Հայաստանի հավաքականը հաղթեց Մոլդովային
ԱՄՆ-ը հայտարարել է ներգաղթի դեմ պայքարի արշավի շրջանակում թուրք «ահաբեկչի» ձերբակալության մասին
Քաղաքականություն
30.01.2025 | 20:45
Սպիտակ տունը հայտարարել է Թուրքիայի քաղաքացու կալանավորման մասին, որը բնութագրվում է որպես «հայտնի կամ կասկածյալ ահաբեկիչ»՝ որպես անօրինական ներգաղթի դեմ համազգային արշավի մաս։ Այս մասին գրում է Turkish Minute-ը՝ վկայակոչելով VOA-ի թուրքական ծառայությանը։
Սպիտակ տան մամուլի քարտուղար Քերոլայն Լևիթը ճեպազրույցի ժամանակ խոսել է անօրինական ներգաղթի հետ կապված Թրամփի վարչակազմի կոշտ դիրքորոշման մասին՝ հայտարարելով վերջին հարկադիր գործողությունների ընթացքում ավելի քան 1100 անօրինական միգրանտների ձերբակալության մասին: Նրանց թվում է Թուրքիայի քաղաքացի, ում Լևիթը նկարագրել է որպես «հայտնի կամ կասկածյալ ահաբեկիչ», որը հունվարի 23-ին ձերբակալվել էր Նյու Յորքում ԱՄՆ ներգաղթի և մաքսային ծառայության կողմից (ICE) «առանց ստուգման մուտք գործելու համար»:
Նա չի բացահայտել թուրք քաղաքացու ինքնությունը։ Ամերիկյան լրատվամիջոցները, վկայակոչելով պաշտոնյաներին, հայտնել են, որ Նյու Յորքում ձերբակալված անձը 30-ամյա Գյոքհան Ադրըգյուզելն է։ Տեղեկություն չկա, թե որ ահաբեկչական խմբավորման հետ է նա կապված։
Վտարանդի թուրք լրագրող Ադեմ Յավուզ Արսլանը Ադրըգյուզելի ձերբակալության մասին X-ում ասել է, որ միջադեպը զգալի խուճապ է առաջացրել, հատկապես, այն թուրք քաղաքացիների շրջանում, որոնք հատել են Մեքսիկայի սահմանը՝ ԱՄՆ մուտք գործելու համար։ Արսլանը տարածել է մի գրառում, որը պարունակում է նախազգուշացումների և առաջարկությունների ցանկ, թե ինչ պետք է անի Թուրքիայի քաղաքացին, երբ հանդիպում է ICE-ի սպայի։
Գրառման մեջ ասվում է, որ ICE աշխատակցի հանդիպելիս չի պահանջվում բացել դուռը, ստորագրել կամ որևէ փաստաթուղթ հանձնել: Կարելի է սպային խնդրել հեռանալ, եթե նա օրդեր չունի, իսկ ձերբակալության դեպքում կարելի է խոսել փաստաբանի հետ:
Լևիթն ասել է, որ նախագահ Թրամփը «բարձր և հստակ ուղերձ» է ուղարկել աշխարհին, որ «Ամերիկան այլևս չի հանդուրժի անօրինական ներգաղթը»:
Թարգմանությունը՝ Էմմա Չոբանյանի
