09.09.2026 | 14:22
ԱԺ առողջապահության հարցերի մշտական հանձնաժողովի նիստը․ ՈՒՂԻՂ
Թրամփը հրամայել է Գուանտանամոյի բազան պատրաստել՝ 30 հազար միգրանտի տեղավորելու համար
Քաղաքականություն
30.01.2025 | 17:26
ԱՄՆ նախագահ Դոնալդ Թրամփը հրամանագիր է ստորագրել, որի համաձայն՝ Կուբայի Գուանտանամոյի ռազմածովային բազան կնախապատրաստվի տասնյակ հազարավոր միգրանտների տեղավորելու համար։ Այս մասին հայտնում են CNN-ը և Reuters-ը։
Պենտագոնը և ներքին անվտանգության նախարարությունը պետք է լրացուցիչ կալանավայրեր տրամադրեն «հանցագործ անօրինական միգրանտների համար, որոնք վտանգ են ներկայացնում ամերիկյան ժողովրդի համար»։
«Մարդկանց մեծ մասը նույնիսկ չգիտի այդ մասին։ Մենք 30,000 տեղ ունենք Գուանտանամոյում ամենավտանգավոր հանցագործ անօրինական միգրանտների համար։ Դա միանգամից կկրկնապատկի մեր հնարավորությունները։ Նրանցից ոմանք այնքան վատն են, որ մենք նույնիսկ չենք վստահում երկրներին, որ պահեն իրենց, քանի որ չենք ուզում, որ նրանք վերադառնան»,- ասել է Թրամփը։
Ներգաղթի հարցերով ԱՄՆ նախագահի խորհրդականները CNN-ին ասել են, որ Գուանտանամոյի նոր հաստատությունը կղեկավարվի ԱՄՆ ներգաղթի և մաքսային ծառայության (ICE) կողմից:
«Մենք պարզապես ընդլայնում ենք գոյություն ունեցող միգրանտների կենտրոնները»,- ասել է սահմանային հարցերով համակարգող Թոմ Հոմանը:
Ներքին անվտանգության նախարար Քրիստի Նոյեմն էլ ասել է, որ բազան կարող է օգտագործվել «վատագույններից վատագույններին» տեղավորելու համար:
Գուանտանամոյի ռազմածովային բազայում միգրանտների հաստատություն արդեն կա՝ օտարերկրացի ահաբեկչության մեջ կասկածվողների համար ամերիկյան բանտից առանձին։
Թրամփը նաև օրենք է ստորագրել, որը պահանջում է դաշնային իրավապահ մարմիններին ձերբակալել գողության և բռնության հանցագործությունների մեջ կասկածվող անօրինական ներգաղթյալներին, նույնիսկ եթե նրանց պաշտոնապես մեղադրանք չի առաջադրվել:
Փաստաթուղթը կրում է 22-ամյա ամերիկացի ուսանող Լեյքեն Ռայլիի անունը, որը սպանվել է 2024 թվականի փետրվարին վազքի ժամանակ վենեսուելացի միգրանտ Խոսե Իբարայի կողմից, որը հետախուզվում էր գողության համար։ Դատարանը վերջինին դատապարտել է ցմահ ազատազրկման։
Թարգմանությունը՝ Էմմա Չոբանյանի
