Ադրբեջանում ՏԻՄ ընտրություններն անցել են ընտրողների ցածր մասնակցության և զանգվածային ընտրախախտումների պայմաններում

Ադրբեջանում հունվարի 29-ին անցկացված տեղական ինքնակառավարման մարմինների ընտրություններին մասնակցությունը եղել է ցածր։ Այս մասին հայտարարել է երկրի ԿԸՀ քարտուղարության տեղեկատվական կենտրոնի տնօրեն Ֆարիդ Օրուջովը։ Նա նշել է, որ ամբողջ երկրում քվեարկել է 1,874,810 մարդ, իսկ մասնակցությունը կազմել է 31,45%։

Հավելենք, որ ըստ ԿԸՀ-ի տվյալների՝ ընտրություններին մասնակցության իրավունք ուներ 5,961,987 քաղաքացի։ 8071 տեղի համար պայքարում էին 16,096 թեկնածուներ, որոնց կեսից ավելին իշխող «Նոր Ադրբեջան» կուսակցության ներկայացուցիչներն էին։

Ընդդիմադիր կուսակցությունները, ինչպիսիք են «Մուսավաթը» և «REAL»-ը, ընտրություններին մասնակցում էին իշխող կուսակցության թեկնածուների հետ միասին: Այնուամենայնիվ, սոցցանցերի օգտատերերը կասկածի տակ են դրել ընդդիմության մասնակցության օրինականությունը՝ նշելով, որ նրանցից շատերը իշխանությունների վստահված անձինք են։

Իշխանությունների հետ ակտիվ շփումներով հայտնի «Հանրապետական ​​այլընտրանք» (REAL) կուսակցության նախագահ Նաթիգ Ջաֆարլին ադրբեջանական  լրատվամիջոցներին ասել է, որ կուսակցության 14 թեկնածուներից 5-ն անցել են մունիցիպալիտետներ։ «Մուսավաթ» կուսակցության փոխնախագահ Մուստաֆա Հաջիբեյլին էլ նշել է, որ իրենց 30 թեկնածուներից ոչ մեկը չի ընտրվել։

Հավելենք, որ Ադրբեջանի ՏԻՄ ընտրություններն ուղեկցվել են զանգվածային ընտրախախտումներով, որոնց մասին ահազանգել են ընդդիմադիր կուսակցությունները, թեկնածուներն ու անկախ լրագրողները։

Ընտրություններում դիտորդ, ակտիվիստ Ահմեդ Մամեդլին հայտնել էր ֆիզիկական բռնության սպառնալիքների մասին։

Ընտրախախտումները ներառում են նաև քվեաթերթիկների լցոնումներ, կարուսելի մեխանիզմ, կրկնաքվեարկության դեպքեր, որոնց տեսանյութերը շարունակում են տարածվել սոցցանցերի ադրբեջանական տիրույթում։

Թարգմանությունը՝ Էմմա Չոբանյանի