09.09.2026 | 11:04
ԱԺ ֆինանսավարկային և բյուջետային հարցերի մշտական հանձնաժողովի նիստը․ ՈՒՂԻՂ
Սիրիայի փաստացի ղեկավար Ահմեդ ալ-Շարաան անցումային նախագահ է նշանակվել
Քաղաքականություն
30.01.2025 | 11:35
Սիրիայի նոր իշխանությունները հայտարարել են, որ Ահմեդ ալ-Շարաան, որը փաստացի ղեկավարում էր երկիրը Բաշար Ասադի տապալումից հետո, նշանակվել է ժամանակավոր նախագահ, հանձնարարվել է անցումային օրենսդիր մարմին ձևավորել։ Այս մասին հաղորդում են սիրիական պետական լրատվամիջոցները, գրում է France 24-ը։
Շարաայի իսլամիստական «Հայաթ Թահրիր ալ-Շամ» խմբավորման (HTS) գլխավորած ապստամբների դաշինքն անցյալ տարվա դեկտեմբերի 8-ին տապալեց Ասադի իշխանությունը, անցումային կառավարություն ձևավորվեց՝ երկիրը ղեկավարելու մինչև մարտի 1-ը։
Շարաայի նշանակման մասին հայտնել է ռազմական պաշտոնյաներից Հասան Աբդել Գանիին՝ չհստակեցնելով ժամկետները։ Նա նաև նշել է, որ Շարաան կներկայացնի Սիրիան «միջազգային ֆորումներում»։ Բացի այդ, Ասադի ժամանակաշրջանի խորհրդարանը ցրվել է, իսկ 2012 թվականի Սահմանադրության գործողությունը՝ կասեցվել:
Գանին նաև հայտարարել է Ասադի տապալմանը մասնակցած բոլոր զինված խմբավորումների, ինչպես նաև նախկին կառավարության բանակի և անվտանգության մարմինների լուծարման մասին:
Ահմեդ ալ-Շարաան հայտարարել է Սիրիայի առաջնահերթությունների մասին, ինչպիսիք են «իշխանության վակուումը լրացնելը, քաղաքացիական խաղաղության պահպանումը, պետական ինստիտուտների վերակառուցումը և զարգացմանը միտված տնտեսության կառուցումը»։
«Հաղթողների առաքելությունը բարդ է, պատասխանատվությունը՝ ահռելի»,- հայտարարել է Շարաան։
Թարգմանությունը՝ Էմմա Չոբանյանի
