08.10.2026 | 18:19
Միրզոյանն ու Ղազախստանի ԱԳ նախարարը քննարկել են տարածաշրջանային փոխկապակցվածությունն ու խաղաղության ջանքերը
Չինաստանը և Հնդկաստանը դադարեցրել են ռուսական նավթի գնումները․ Reuters
Քաղաքականություն
28.01.2025 | 22:30
Չինաստանը և Հնդկաստանը դադարեցրել են ռուսական նավթի գնումները մարտ ամսվա մատակարարումների համար՝ կապված ԱՄՆ պատժամիջոցների տակ չընկնող լցանավերի բեռնափոխադրումների թանկացման հետ, հայտնում է Reuters-ը՝ վկայակոչելով թրեյդերներին:
Ռուսական ESPO նավթի պրեմիումը, ICE Brent-ի համեմատ, աճել է 3-5 դոլարով՝ մեկ բարելի դիմաց, գրում է Reuters-ը։ Նշվում է, որ Չինաստանի երթուղու վրա գտնվող Aframax տանկերի բեռնափոխադրումների գները բարձրացել են մի քանի միլիոն դոլարով:
Հնդկաստանի խոշորագույն նավթավերամշակող Indian Oil Corp-ը գործակալությանը հայտնել է, որ ընթացիկ ֆինանսական տարում, որն ավարտվում է մարտի 31-ին, բախվել է ռուսական նավթի ներմուծման կրճատման:
Ռուսական նավթի մասնաբաժինն ընկերության ներմուծման մեջ ֆինանսական տարվա առաջին ինն ամիսներին նվազել է մինչև 25%՝ 2023-24 թվականների 30%-ից, հայտնել է ընկերության գլխավոր ֆինանսական տնօրեն Անուջ Ջայնը։ Ջայնն ասել է, որ նավթի պակաս չկա, և ընկերությունը կգնի ռուսական հումք միայն այն դեպքում, եթե ստանա «ողջամիտ զեղչեր»:
Հունվարի 10-ին ԱՄՆ-ը պատժամիջոցներ է սահմանել Ռուսաստանի էներգետիկ ոլորտի դեմ։ Մոտ 180 լցանավեր ենթարկվել են սահմանափակումների։ Ավելի ուշ Bloomberg-ը հայտնել է, որ Հնդկաստանը կհրաժարվի լցանավերի բեռնաթափումից, որոնք ենթակա են ԱՄՆ պատժամիջոցների:
Reuters-ը գրել է, որ ԱՄՆ-ը Հնդկաստանից պահանջել է բեռնաթափել ռուսական նավթը լցանավերից մինչև փետրվարի 27-ը։
Թարգմանությունը՝ Տաթև Ֆռանգյանի
