Արցախը բացահայտում է Ադրբեջանի արմենոֆոբիան․ հրապարակվել է հատուկ զեկույց

Արցախի Հանրապետության Մարդու իրավունքների պաշտպանը հրապարակել է «Հայատյացությունն Ադրբեջանում. կազմակերպված ատելության խոսքն ու թշնամությունն ընդդեմ հայերի» հատուկ զեկույց, որի նպատակն է աշխարհի համար բացահայտել Ադրբեջանի վարած հակահայկական քաղաքականությունն ու արմատացած հայատյացությունը, որը երկրում որդեգրված է որպես գաղափարախոսություն։

Ծրագիրն իրականացվել է Թուֆենկյան բարեգործական հիմնադրամի հետ համագործակցությամբ։

Հիմադրամի գործադիր տնօրեն Րաֆֆի Դուդակլյանն այսօր հրավիրված մամուլի ասուլիսի ժամանակ, խոսելով զեկույցի  մասին, նշեց, որ այս զեկույցով բացահայտվում է Ադրբեջանի արմենոֆոբիան։

«Մենք պետք է միջազգային հանրությանը հասցնենք այն տեղեկատվությունը, որ Ադրբեջանում հայատյացությունն ու հակահայ քարոզչությունը մեկօրյա դրսևորում չեն, դրանք տարիներ ի վեր շարունակական են, իսկ երբ սահաններին լարվածություն  է նկատվում, այդ հայատյացությունն ավել է թեժանում։ Սա կազմակերպված հայատյացություն է, որը կարող է հանգեցնել կազմակերպված սպանդի, ինչպիսին ականատես ենք եղել դեռ տարիներ առաջ՝ Արցախում։ Հետևաբար խնդիր ունենք հետևել Ադրբեջանի կառավարության հովանավորած հակահայկական քարոզչությունը։ Ուստի սա մի աշխատանք է, որը շարունակություն է ունենալու այնքան ժամանակ, քանի դեռ հակահայկական այդ քարոզչական մեքենան կանգ չի առել»,- ասաց Դուդակլյանը։

Վերջինս նշեց, որ իրենք պարտավորություն ունեն շարունակել աշխարհին իրազեկել Ադրբեջանում պետական մակարդակով տարվող քարոզչության մասին, ուստի դրանք կանխելու համար անհրաժեշտ է ռասիզմի դեմ, կազմակերպված սպանդների դեմ պայքարով զբաղվող միջազգային կազմակերպությունների ուշադրությունը հրավիրել այս զեկույցի վրա։

Նշենք, որ զեկույցը հրապարակված է անգլերենով։