Ես այդ պայմանագիրը չեմ տեսել. ՀՀԿ-ականը` ՌԴ-ից ձեռք բերված սպառազինության մասին․ ՏԵՍԱՆՅՈՒԹ

«Կերպափոխումը տրանսֆորմացիան է, տրանսֆորմացվում են քաղաքական համակարգերը, տեխնոլոգիական մեխանիզմները, տրանսֆորմացիա մեր բանակը չի կարող ունենալ, որովհետև բանակները չեն տրանսֆորմացվում։ Բանակը կարող է զարգանալ, արդիականանա, իր հմտությունները, կարողությունները մեծացնի՝ օդում, ծովում, ցամաքում, բայց տրանսֆորմացիա հասկացությունը շատ կասկածելի է: Իրենց տրանսֆորմացիան հետևյալն է լինելու, որ բանակը դառնալու է աշխատավարձ ստանալու տեղ»,- այս մասին «Եռաբլուր»-ում լրագրողների հետ զրույցում նշեց ՀՀԿ- ական, պաշտպանության նախկին փոխնախարար Արտակ Զաքարյանը՝ պատասխանելով Սերժ Սարգսյանի՝ բանակի օրվան նվիրված ուղերձին, որում նա նշել, թե հիմա էլ իշխանությունները բանակում «կերպափոխում» կոչվող տարակուսելի գործընթաց են սկսել։

Դիտարկմանը՝ ըստ իշխանության ներկայացուցիչների՝ բանակի կերպափոխումը նաև սպառազինության ձեռքբերման դիվերսիֆիկացիայով է պայմանավորված և այդ շուկան մեկ երկրից կախված չէ, ՀՀԿ ներկայացուցիչը պատասխանեց․ «Միշտ չէ, որ սպառազինության շուկաները լինում են ստաբիլ, նաև երկրի խնդիրն է իր առջև դրված խնդիրներից ելնելով, իր զինված ուժերը զարգացնելու միտումով փնտրել այնպիսի շուկաներ, որոնք էժան են, հասանելի են և հնարավոր է այդ շուկաներից ձեռք բերվող զինատեսակները։ Հուսով եմ, որ մենք նաև Արևմուտքում էլ, արևելքում էլ ունենալու ենք նոր գործընկերներ ռազմատեխնիկական համագործակցության տեսանկյունից։ Հուսով եմ նաև, որ մենք հնարավորություն ունենալու ենք վերադառնալու մեր ռազմավարական դաշնակցի հետ ռազմատեխնիկական համագործակցությանը»։

Զաքարյանին հիշեցրինք, որ ռազմավորական գործընկեր Ռուսաստանը վճարված գումարի դիմաց ՀՀ-ին չի մատակարարել սպառազինություն, նախկին փոխնախարարն արձագանքեց, որ այդ պայմանագիրը չի տեսել, և չի կարող ոչինչ ասել։ Նա նաև պնդեց, թե իրենց իշխանութան ժամանակ չի եղել դեպք, երբ Ռուսաստանին զենքի համար վճարեն, բայց զենքը չտան։

«Չի եղել նման բան, մեզ 50 հազար տոննա ձրի զենք են նվիրել, ու դրանք ամբողջությամբ պիտանի են եղել»,- հայտարարեց Զաքարյանը։