24.06.2026 | 23:56
Հրդեհ Վարդաշեն 6-րդ փողոցի շենքերից մեկում. մեկ անձ դիմել է բուժօգնության, տարհանվել է 12 քաղաքացի
Սերբիայի վարչապետը հրաժարական է տվել բողոքի ցույցերի ֆոնին
Քաղաքականություն
28.01.2025 | 15:15
Սերբիայի վարչապետ Միլոշ Վուչևիչը հրաժարական է տվել երկրում բողոքի ցույցերի ֆոնին։ Այս մասին նա հայտարարել է կառավարությունում հրավիրված արտահերթ ճեպազրույցում, փոխանցում է ՈԻԱ Նովոստին։
«Կարծում եմ՝ քաղաքականությունը, որին ես պատկանում եմ, կուսակցությունը, որը ես ղեկավարում եմ, որը հանրապետության նախագահի հետ միասին բազմիցս հաղթել է 2012 թվականից ի վեր բոլոր ընտրություններում՝ նախագահական, խորհրդարանական, տեղական, պետք է ցուցաբերի պատասխանատվության բարձր աստիճան, պետք է սերբական քաղաքականության մեջ նոր օրինաչափություն ցույց տա, որ այն օբյեկտիվորեն ամենապատասխանատուն է։ Ուստի իմ անբեկանելի որոշումն է՝ հրաժարական տալ Սերբիայի վարչապետի պաշտոնից»,- ասել է նա՝ հավելելով, որ հրաժարական է տվել նաև Նովի Սադի քաղաքապետ Միլան Ջուրիչը։
Նրա խոսքով՝ նախագահ Վուչիչը գիշերային հեռախոսազրույցում աջակցել է այս որոշմանը։ Կառավարությունն առայժմ կշարունակի աշխատել տեխնիկական մանդատի ներքո։
Ուսանողների և ընդդիմության զանգվածային բողոքի ցույցերը Սերբիայում սկսվել են նոյեմբերին, երբ Նովի Սադում երկաթուղային կայարանի շենքի հովանոցը փլուզվել է, մարդիկ են զոհվել։ Բողոքի ցույցերի մասնակիցները պահանջում են կայանի վերակառուցման վերաբերյալ ամբողջական փաստաթղթերի հրապարակում, ողբերգության մեջ ներգրավված պաշտոնյաների քրեական պատասխանատվություն և բողոքի ցույցերի ընթացքում ձերբակալված բոլոր անձանց հետապնդումից ազատում:
Թարգմանությունը՝ Տաթև Ֆռանգյանի
