24.06.2026 | 23:56
Հրդեհ Վարդաշեն 6-րդ փողոցի շենքերից մեկում. մեկ անձ դիմել է բուժօգնության, տարհանվել է 12 քաղաքացի
Թրամփը ամերիկյան «Երկաթե գմբեթ» ստեղծելու հրամանագիր է ստորագրել․ Պենտագոնին 60 օր ժամանակ է տրվել
Քաղաքականություն
28.01.2025 | 14:36
ԱՄՆ նախագահ Դոնալդ Թրամփը հրամանագիր է ստորագրել երկրի համար «Երկաթե գմբեթ» հակաօդային պաշտպանության համակարգի նախագծումը սկսելու մասին, ինչպիսին Իսրայելն է օգտագործում, գրում է France 24-ը։
Թրամփը հանձնարարել է պաշտպանության նախարարին 60 օրվա ընթացքում ներկայացնել «հաջորդ սերնդի հակահրթիռային վահանի» ծրագիր, որը նախատեսված է բալիստիկ, գերձայնային և առաջադեմ թևավոր հրթիռներից պաշտպանվելու համար։
2024 թվականին նախընտրական քարոզարշավի ընթացքում Թրամփը բազմիցս խոստացել է ԱՄՆ-ի համար կառուցել իսրայելական «Երկաթե գմբեթ» համակարգի տարբերակը։
Լրատվամիջոցը, սակայն, նշում է, որ նա անտեսում է այն փաստը, որ համակարգը նախատեսված է փոքր հեռահարության սպառնալիքների համար, ինչն այն դարձնում է ոչ պիտանի միջմայրցամաքային հրթիռներից պաշտպանվելու համար, որոնք հիմնական վտանգն են Միացյալ Նահանգների համար:
«Վերջին 40 տարիների ընթացքում հաջորդ սերնդի ռազմավարական սպառազինության սպառնալիքը չի նվազել, այլ դարձել է ավելի ինտենսիվ և բարդ»,- ասվում է հրապարակված հրամանագրում:
Իսրայելը «Երկաթե գմբեթ» համակարգն օգտագործել է՝ իր տարածաշրջանային թշնամիների՝ ՀԱՄԱՍ-ի կողմից Գազայի հատվածում և լիբանանյան «Հըզբոլլահ»-ի կողմից արձակված հրթիռները խոցելու համար։
Թրամփը ստորագրել է մի քանի այլ հրամաններ ևս՝ կապված ԱՄՆ զինված ուժերի հետ, որից մեկն արգելում է տրանսգենդերներին ծառայել բանակում։
Թարգմանությունը՝ Էմմա Չոբանյանի
