09.09.2026 | 18:44
Ըստ Զատուլինի՝ ՀՀ-ի հետ առևտրատնտեսական հարաբերություններում «մեղմացում չի լինի, քանի դեռ Նիկոլ Փաշինյանը իշխանության է»
Թուրքիան ցանկանում է Սաուդյան Արաբիայի հետ 6 մլրդ դոլարի զենքի վաճառքի գործարք կնքել
Քաղաքականություն
28.01.2025 | 13:45
Թուրքիան ձգտում է Սաուդյան Արաբիայի հետ 6 միլիարդ դոլարի պաշտպանական պայմանագիր կնքել։ Այս մասին հայտնել է Bloomberg-ի լրագրող Սելջան Հաջաօղլուն՝ հղում անելով թուրք պաշտոնյաներին, փոխանցում է Duvar-ը։
Ակնկալվում է, որ գործարքը կներառի Սաուդյան Արաբիայի կողմից ռազմանավերի, տանկերի և հրթիռների գնում, ինչպես նաև մասնակցություն Թուրքիայի կործանիչների նախագծին:
Bloomberg-ին աղբյուրները հայտնել են, որ գործարքը կվերջնականացվի Թուրքիայի նախագահ Ռեջեփ Թայիփ Էրդողանի՝ մարտին Սաուդյան Արաբիա ծրագրված այցի ընթացքում։
Լրատվամիջոցը հայտնում է, որ Թուրքիայի և Սաուդյան Արաբիայի միջև 2023 թվականին կնքված համաձայնագիրը Ռիադի համար ճանապարհ է հարթել թուրքական «Բայքար» պաշտպանական ընկերությունից անօդաչու սարքեր գնելու համար: Անկարան այժմ նպատակ ունի ընդլայնել պաշտպանական արտադրանքի արտահանումը՝ Սաուդյան Արաբիային վաճառելով հակահրթիռային պաշտպանության համակարգեր և «Ալթայ» տանկեր։ Գործարքը ներառում է նաև Սաուդյան Արաբիայի միացումը Թուրքիայի Kaan կործանիչների ծրագրին:
Թուրք պաշտոնյաները նշել են, որ նախագծին կարող են միանալ նաև այլ երկրներ։ Թուրքիայի արտաքին գործերի նախարար Հաքան Ֆիդանը հունվարի 28-ին կայցելի Սաուդյան Արաբիա, ըստ ամենայնի, համաձայնագիրը քննարկելու նպատակով:
Սաուդյան Արաբիայի իշխանությունները չեն արձագանքել լրատվամիջոցի մեկնաբանության խնդրանքին, իսկ Թուրքիայի ՊՆ-ն հրաժարվել է որևէ հայտարարություն անելուց։
Թարգմանությունը՝ Էմմա Չոբանյանի
