ԵՄ երկրները համաձայնել են աստիճանաբար մեղմել Սիրիայի դեմ պատժամիջոցները

Սիրիայի նախագահ Բաշար Ասադի տապալումից յոթ շաբաթ անց ԵՄ ԱԳ նախարարները համաձայնության են եկել աստիճանաբար մեղմել Դամասկոսի դեմ պատժամիջոցները, գրում է DW-ի ռուսական ծառայությունը։

Նախօրերին Բրյուսելում ԵՄ խորհրդի նիստում համաձայնեցվել է Սիրիայի նկատմամբ պատժամիջոցների չեղարկման ճանապարհային քարտեզը, հայտնել է ԵՄ արտաքին գործերի և անվտանգության քաղաքականության հարցերով բարձր ներկայացուցիչ Կայա Կալլասը։ Նա ընդգծել է, որ ԵՄ-ն «հանձնառու է արագ գործել» սահմանափակող միջոցների մեղմացման հարցում, սակայն Սիրիայի դեմ պատժամիջոցները չեղարկելու որոշումը կարող է վերանայվել, եթե Դամասկոսի նոր իշխանությունները «սխալ քայլեր ձեռնարկեն»։ Կալլասը հայտարարել է նաև Դամասկոսում ԵՄ առաքելության հնարավոր վերսկսման մասին։

Ըստ գերմանական dpa գործակալության՝ մեղմացնելով պատժամիջոցների ռեժիմը՝ ԵՄ-ն ձգտում է Սիրիայի նոր իշխանություններին ժողովրդավարություն կառուցելու խթաններ տրամադրել։ Բացի այդ, Եվրամիությունը հույս ունի, որ դրա արդյունքում հարյուր հազարավոր սիրիացի փախստականներ կվերադառնան իրենց հայրենիք:

Ֆրանսիայի ԱԳ նախարար Ժան-Նոել Բարրոն հայտարարել է, որ առաջին հերթին առաջարկվում է չեղարկել էներգետիկ ոլորտի, տրանսպորտի և ֆինանսական հաստատությունների հետ կապված պատժամիջոցները։ Reuters-ի փոխանցմամբ՝ ավիաընկերությունների, այդ թվում՝ պետական ​​«Syrian Arab Airlines»-ի նկատմամբ պատժամիջոցները կարող են չեղարկվել, իսկ նավթի էմբարգոն կարող է վերանայվել։

Գերմանիայի ԱԳ նախարար Աննալենա Բերբոքն էլ ասել է, որ որոշումը լավ նորություն է սիրիացիների, ինչպես նաև եվրոպացիների համար:

«Մենք ցանկանում ենք, որ Սիրիայում մարդիկ նորից էլեկտրաէներգիա ունենան և կարողանան վերականգնել տնտեսությունը»,- նշել է նա՝ հավելելով, որ պատժամիջոցների թուլացումը «քարտ բլանշ չէ» Սիրիայի նոր ղեկավարության համար, և որ ԵՄ-ն չի ֆինանսավորի «նոր ծայրահեղական, ահաբեկչական կամ իսլամիստական ​​կառույցներին»։

Բերբոքը նաև հայտարարել է, որ Ասադի և նրա շրջապատի դեմ պատժամիջոցները կմնան ուժի մեջ, և որ Գերմանիան ևս 3 միլիոն եվրո կհատկացնի Սիրիայում ՄԱԿ-ի մարդու իրավունքների գերագույն հանձնակատարի ներկայացուցչի աշխատանքի համար։

Թարգմանությունը՝ Էմմա Չոբանյանի