14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Թել Ավիվում վերսկսվել են Նեթանյահուի դեմ գործերով լսումները
Քաղաքականություն
27.01.2025 | 18:10
Իսրայելի վարչապետ Բենիամին Նեթանյահուն ժամանել է Թել Ավիվի շրջանային դատարան, որտեղ վերսկսվել են լսումները երեք գործերով՝ կաշառակերություն, խարդախություն և հանրային վստահության խախտում, հաղորդում է Channel 12-ը։
Դրանք դատարանում լսվում են 2024 թվականի դեկտեմբերի 10-ից։ Մեղադրանքները վարչապետին առաջադրվել են 2019 թվականին։
Դատական նիստերը, որոնց ընթացքում Բենիամին Նեթանյահուն պետք է ցուցմունք տա, սկսվել են մեկամսյա ընդմիջումից հետո։ Փաստաբանները հետաձգում են խնդրել, քանի որ դեկտեմբերի վերջին Իսրայելի վարչապետը շագանակագեղձի վիրահատություն է տարել։ Մինչ նիստերի սկսվելը՝ փաստաբանները խնդրել են երեքի փոխարեն շաբաթական մեկ նիստ անցկացնել, սակայն դատարանը մերժել է։
Բենիամին Նեթանյահուի դեմ առաջադրված առաջին մեղադրանքը կապված է իսրայելական հեռուստաալիքներից մեկի համար մի քանի հարյուր միլիոն դոլարի հնարավոր կաշառքի հետ՝ լրատվամիջոցների կողմից բարենպաստ լուսաբանման դիմաց: Երկրորդը վերաբերում է վարչապետի և թերթերից մեկի հրատարակչի միջև ենթադրվող դավադրությանը։ Երրորդ մեղադրական եզրակացության համաձայն՝ Նեթանյահուն հովանավորչության դիմաց թանկարժեք նվերներ է ստացել պրոդյուսեր Առնո Միլչանից և միլիարդատեր Ջեյմս Փաքերից։ Վարչապետը հերքում է բոլոր մեղադրանքները։
Թարգմանությունը՝ Տաթև Ֆռանգյանի
