ՀԱՊԿ-ը Բելառուսում ընտրությունները «մրցակցային և բաց» է անվանել

Հավաքական անվտանգության պայմանագրի կազմակերպության (ՀԱՊԿ) Խորհրդարանական վեհաժողովի դիտորդները Բելառուսում նախագահական ընտրությունները «մրցակցային և բաց են» համարել։ Այս մասին հայտարարել է ՀԱՊԿ ԽՎ դիտորդական խմբի համակարգող Վիկտորյա Աբրամչենկոն։

«Նախընտրական քարոզարշավում հինգ թեկնածուների ներկայությունն ապահովել է ընտրությունների մրցակցային բնույթը և ընտրողներին տեղեկացված ընտրություն կատարելու իրական հնարավորություն տվել»,- ճեպազրույցում ասել է Վիկտորյա Աբրամչենկոն, որի խոսքերն է մեջբերում Կոմերսանտը։

Հիշեցնենք, որ ԵՄ արտաքին հարաբերությունների և անվտանգության քաղաքականության գերագույն ներկայացուցիչ Կայա Կալլասն ու Հարևանության և ընդլայնման քաղաքականության հարցերով հանձնակատար Մարթա Կոսը հունվարի 26-ի Բռելառուսի ընտրությունները «ոչ ազատ, ոչ արդար» են անվանել, և հայտարարել են, որ բելառուս ժողովուրդն «արժանի է իրական ձայնի»։

«Բելառուսում մարդու իրավունքների անողոք ճնշումը, քաղաքական մասնակցության սահմանափակումը և անկախ լրատվամիջոցներին անհասանելիությունը զրկել են ընտրական գործընթացը ցանկացած լեգիտիմությունից»,- գրել են Կալլասը և Կոսը:

Լուկաշենկոյին «նախագահական ընտրություններում հաղթելու» կապակցությամբ շտապել են շնորհավորել ՌԴ նախագահ Վլադիմիր Պուտինը, Ադրբեջանի ղեկավար Իլհամ Ալիևը։ Ալիևը զանգահարել և շնորհավորել է Լուկաշենկոյին նախագահի պաշտոնում վերընտրվելու կապակցությամբ և հաջողություններ մաղթել նրան աշխատանքում։

Պուտինը նշել է, որ վերջին շրջանում երկու ղեկավարներին հաջողվել է շատ բան անել Մոսկվայի և Մինսկի միջև բարեկամական կապերի ամրապնդման համար։ Նա ընդգծել է, որ Ռուսաստանը և Բելառուսը կշարունակեն սերտորեն համագործակցել բազմակողմ համագործակցության հետագա զարգացման, Միութենական պետության պետական ինստիտուտների արդյունավետության բարձրացման և եվրասիական տարածքում փոխշահավետ ինտեգրացիոն գործընթացների խթանման համար։

Լուկաշենկոյին զանգահարել ու շնորհավորել են նաև Ղազախստանի նախագահ Կասիմ Ժոմարտ Տոկաևը, Ուզբեկստանի նախագահ Շավքաթ Միրզիոևը, Տաջիկստանի նախագահ Էմոմալի Ռահմոնը։

Թարգմանությունը՝ Տաթև Ֆռանգյանի