18.12.2025 | 01:35
Տհաճ միջադեպ՝ Արման Ծառուկյանի մենամարտի ժամանակ. ՏԵՍԱՆՅՈՒԹ
ՀՀ ԱԳ փոխնախարարը Դամասկոսում է․ նա հանդիպել է Սիրիայի նոր ԱԳ նախարարին
Քաղաքականություն
27.01.2025 | 14:17
ՀՀ ԱԳ փոխնախարար Վահան Կոստանյանը Սիրիայում է։ Նա Դամասկոսում հանդիպել է երկրի նորանշանակ ԱԳ նախարարի հետ։ Այս մասին X-ի իր միկրոբլոգում հայտնել է Կոստանյանը։
«Հայաստանի և Սիրիայի միջև հարաբերությունների զարգացման հեռանկարները քննարկել ենք արտգործնախարար Ասադ ալ-Շայբանիի հետ։ Պայմանավորվել ենք շարունակել համագործակցությունը»,- նշել է ՀՀ ԱԳ փոխնախարարը։
Այցի մասին ՀՀ ԱԳ նախարարությունը հաղորդագրություն է տարածել, որում ասվում է․
«Շնորհակալություն հայտնելով ջերմ ընդունելության համար՝ ԱԳ նախարարի տեղակալը փոխանցել է Հայաստանի կառավարության հանձնառությունը՝ զարգացնել երկկողմ հարաբերությունները սիրիական կողմի հետ: Զրուցակիցները մտքեր են փոխանակել համագործակցության հնարավոր ուղղությունների վերաբերյալ:
Վահան Կոստանյանը հաստատել է հայկական կողմի պատրաստակամությունը՝ աջակցելու հումանիտար և բարեփոխումների իրականացման ոլորտներում, ինչպես նաև Սիրիայում առաջնահերթություն համարվող տարատեսակ այլ ծրագրերին:
Երկուստեք շեշտվել են Հայաստանի և Սիրիայի ժողովուրդների միջև առկա պատմական ամուր կապերը: Այս համատեքստում աջակցություն է հայտնվել Սիրիայում համերաշխության մթնոլորտի ձևավորմանը և ներառականությանն ուղղված ջանքերին:
Զրուցակիցները մտքեր են փոխանակել տարածաշրջանային զարգացումների վերաբերյալ՝ ընդգծելով հարևանների հետ հարաբերությունների կարգավորման կարևորությունը:
Սիրիական կողմը բարձր է գնահատել ՀՀ պատվիրակության այցը Դամասկոս: Պայմանավորվածություն է ձեռք բերվել շարունակել շփումները»:
Հիշեցնենք, որ Սիրիայի նախկին նախագահ Բաշար Ասադը, որը շուրջ 25 տարի երկրի առաջնորդ էր, փախել էՌուսաստան այն բանից հետո, երբ անցյալ տարվա դեկտեմբերի 8-ին հակակառավարական ընդդիմադիր խմբավորումները վերահսկողություն են հաստատել մայրաքաղաք Դամասկոսի նկատմամբ։ Մոսկվան Ասադին ու նրա ընտանիքի անդամներին ապաստան է տրամադրել։
Թարգմանությունը՝ Էմմա Չոբանյանի
