08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
Պուտինն ու Ալիևն առաջիններից են շնորհավորել Լուկաշենկոյին ընտրություններում հաղթանակի կապակցությամբ
Քաղաքականություն
27.01.2025 | 14:34
Ադրբեջանի նախագահ Իլհամ Ալիևն առաջիններից է շնորհավորել Ալեքսանդր Լուկաշենկոյին Բելառուսի նախագահական ընտրություններում հաղթանակի կապակցությամբ։ Ադրբեջանական լրատվամիջոցների հաղորդմամբ՝ Ալիևը զանգահարել և շնորհավորել է Լուկաշենկոյին նախագահի պաշտոնում վերընտրվելու կապակցությամբ և հաջողություններ մաղթել նրան աշխատանքում։
Նշվում է, որ հեռախոսազրույցի ընթացքում պետությունների ղեկավարները վստահություն են հայտնել, որ երկու երկրների միջև բարեկամական և գործընկերային հարաբերությունները կշարունակեն զարգանալ։ Նրանք նաև մտքեր են փոխանակել համագործակցության հեռանկարների շուրջ։
ՌԴ նախագահ Վլադիմիր Պուտինը նույնպես շնորհավորել է Լուկաշենկոյին։ Շնորհավորական ուղերձում նշվում է, որ «ընտրություններում համոզիչ հաղթանակն ակնհայտորեն ցույց է տալիս Լուկաշենկոյի բարձր քաղաքական հեղինակությունը», ինչպես նաև «բնակչության անկասկած աջակցությունը» պետական կուրսին, որին հետևում է Բելառուսը։
Պուտինը նշել է, որ վերջին շրջանում երկու ղեկավարներին հաջողվել է շատ բան անել Մոսկվայի և Մինսկի միջև բարեկամական կապերի ամրապնդման համար։ Նա ընդգծել է, որ Ռուսաստանը և Բելառուսը կշարունակեն սերտորեն համագործակցել բազմակողմ համագործակցության հետագա զարգացման, Միութենական պետության պետական ինստիտուտների արդյունավետության բարձրացման և եվրասիական տարածքում փոխշահավետ ինտեգրացիոն գործընթացների խթանման համար։
Լուկաշենկոյին զանգահարել ու շնորհավորել են նաև Ղազախստանի նախագահ Կասիմ Ժոմարտ Տոկաևը, Ուզբեկստանի նախագահ Շավքաթ Միրզիոևը, Տաջիկստանի նախագահ Էմոմալի Ռահմոնը։
Հիշեցնենք, որ Բելառուսի ԿԸՀ-ի նախնական տվյալներով՝ ընտրություններում Լուկաշենկոն ստացել է ձայների 86,82 տոկոսը։
Թարգմանությունը՝ Էմմա Չոբանյանի
