10.05.2025 | 15:55
Հանրապետությունում սպասվում են անձրևներ
ԱՄՆ իշխանությունները Մեքսիկական ծոցը վերանվանել են Ամերիկյան ծոց
Քաղաքականություն
25.01.2025 | 13:27
ԱՄՆ կառավարությունը Մեքսիկական ծոցը վերանվանել է Ամերիկյան ծոց, իսկ Դենալի լեռը՝ Մաք-Քինլի լեռ․գրում է DW-ի ռուսական ծառայությունը։
Նշվում է․ որ անվանափոխման որոշումը «ուժի մեջ է մտնում անմիջապես» և ուրբաթ օրը՝ հունվարի 24-ին, որոշումը հրապարակվել է ԱՄՆ Ներքին գործերի նախարարության կայքում։
«ԱՄՆ աշխարհագրական անունների խորհուրդը, որը գտնվում է ՆԳՆ իրավասության ներքո, արդեն արագ աշխատում է աշխարհագրական անունների տեղեկատվական համակարգում պաշտոնական դաշնային անվանացանկը թարմացնելու ուղղությամբ» – ասվում է գերատեսչության հաղորդագրությունում՝ ընդգծելով, որ այս փոփոխությունները վերահաստատում են երկրի հանձնառությունը՝ պահպանել Ամերիկայի ժառանգությունը, դրանով իսկ ապահովելով, որ ամերիկացիների ապագա սերունդները հարգեն իրենց հերոսներին ու պատմական արժեքները։
Մինչդեռ Reuters-ը գրում է, որ Մեքսիկական ծոցի նոր անվանումը, դժվար թե, միջազգայնորեն ճանաչվի․ «Մեքսիկական ծոց անվանումը միջազգայնորեն ճանաչված է և դարեր շարունակ օգտագործվել է որպես ծովային նավագնացության հղման կետ»:
Հունվարի սկզբին Մեքսիկայի նախագահ Կլաուդիա Շեյնբաումը կատակով առաջարկել էր Հյուսիսային Ամերիկայի մի հատվածը, ներառյալ Միացյալ Նահանգները, վերանվանել «Մեքսիկական Ամերիկա»։
Հիշեցնենք, որ ԱՄՆ նորընտիր նախագահ Դոնալդ Թրամփը երդմնակալության արարողության իր ելույթում էր հայտարարել, որ պատրաստվում են Մեքսիկական ծոցը վերանվանել Ամերիկյան ծոց, իսկ լեռը՝ ԱՄՆ մեծ նախագահ Ուիլյամ Մաք-Քինլիի անունով՝ Մաք-Քինլի լեռ։
«Նախագահ Մաք-Քինլին (Ամերիկայի Միացյալ Նահանգների 25-րդ նախագահը Հանրապետական կուսակցությունից, որ պաշտոնավարել է 1897-1901 թթ․-խմբ․) մեր երկիրը շատ հարստացրեց․ նա բնատուր բիզնեսմեն էր և Թեդի Ռուզվելտին (Թեոդոր Ռուզվելտ, ԱՄՆ 26-րդ նախագահը՝ Հանրապետական կուսակցությունից, որ պաշտոնավարել է 1901-1909 թթ․-խմբ) մեծ գումարներ թողեց շատ մեծ գործերի համար, ներառյալ Պանամայի ջրանցքի, որը հիմարաբար տրվեց Պանամայի Հանրապետությանը․․․ Մտածեք այն մասին, որ այս նախագծի վրա ավելի շատ գումար է ծախսվել, քան երբևէ որևէ նախագծի և 38 000 կյանք է կորսվել հանուն Պանամայի ջրանցքի: Մեզ հետ շատ վատ են վարվել այս հիմար նվերից հետո, որը երբեք չպետք է տրվեր, և Պանամայի Հանրապետության տված խոստումը խախտվել է: Մեր գործարքի նպատակն ու մեր պայմանագրի էությունն ամբողջությամբ խախտվել են։ ԱՄՆ նավատորմի նավերը գերծանրաբեռնված են։ Չինաստանն է շահագործում Պանամայի ջրանցքը, իսկ մենք այն չենք տվել Չինաստանին, տվել ենք Պանամային, ու մենք այն հետ ենք վերցնում»,- ասել էր Թրամփը։
Թարգմանությունը՝ Անահիտ Խաչատրյանի
