17.12.2025 | 16:05
ՆԱՏՕ-ի գլխավոր քարտուղարի տեղակալը վաղը Հայաստան կայցելի
Եթե 2020-ին Թրամփից չգողանային հաղթանակը, ուկրաինական ճգնաժամը գուցե չլիներ. Պուտին
Քաղաքականություն
25.01.2025 | 12:59
ՌԴ նախագահ Վլադիմիր Պուտինը, մեկնաբանելով Դոնալդ Թրամփի հայտարարությունները Ուկրաինայում պատերազմի ավարտի համար բանակցությունների անհրաժեշտության մասին, ասել է, որ եթե Թրամփը լիներ ԱՄՆ նախագահը 2022 թվականին, ապա միգուցե ռուս-ուկրաինական լայնամասշտաբ պատերազմ չսկսվեր։ Այս մասին նա ասել է «Россия» հեռուստաալիքի թղթակից Պավել Զարուբինին տված հարցազրույցում․ գրում է meduza.io-ն։
«Ռուսաստանը երբեք չի հրաժարվել ԱՄՆ վարչակազմի հետ կապեր պահպանելուց։ Եվ մենք մեղավոր չենք, որ նախորդ վարչակազմը հրաժարվեց այդ շփումներից։ ԱՄՆ ներկայիս նախագահի հետ ես միշտ գործնական, բայց միևնույն ժամանակ պրագմատիկ հարաբերություններ եմ ունեցել, վստահելի, ես կասեի։ Եվ ես չեմ կարող չհամաձայնել նրա հետ, որ եթե նա լիներ նախագահ, եթե 2020 թվականին նրանից չգողանային հաղթանակը, գուցե 2022 թվականին ծագած ճգնաժամն Ուկրաինայում չէր լինի»,- ասել է Պուտինը։
Պուտինի խոսքով, ավելի լավ կլինի, որ նախագահները «հանդիպեն՝ ելնելով այսօրվա իրողություններից, և հանգիստ զրուցեն բոլոր այն ոլորտների շուրջ, որոնք հետաքրքրում են և՛ Միացյալ Նահանգներին, և՛ Ռուսաստանին»։
«Մենք պատրաստ ենք»,- ասել է ՌԴ նախագահը` հավելելով, որ առաջին հերթին նման հանդիպման հնարավորությունը «կախված է ներկայիս ամերիկյան վարչակազմի որոշումներից և ընտրությունից»։
Պուտինը նաև ասել է, որ Ռուսաստանը պատրաստ է Ուկրաինայի հարցով բանակցություններին։
Հունվարի 23-ին, ելույթ ունենալով Դավոսի տնտեսական ֆորումում, Թրամփը հայտարարել է, որ կցանկանար մոտ ապագայում հանդիպել Վլադիմիր Պուտինի հետ՝ Ուկրաինայի պատերազմին վերջ տալու համար։
«Ես իսկապես կցանկանայի շուտով հանդիպել նախագահ Պուտինի հետ՝ այս պատերազմը վերջ տալու համար։ Եվ սա ոչ տնտեսագիտության կամ այլ բանի տեսանկյունից է։ «Սա միլիոնավոր կյանքերի վատնման առումով է», – ասել է Թրամփը։
Միաժամանակ նա նշել է, որ խնդրելու է Սաուդյան Արաբիային և ՕՊԵԿ-ի երկրներին իջեցնել նավթի գինը, ինչը, նրա կարծիքով, կհանգեցնի ռուս-ուկրաինական պատերազմի «անհապաղ» դադարեցմանը։
Նախօրեին նա ասել էր, որ բարձր հարկեր, տուրքեր և պատժամիջոցներ կսահմանի այն ամենի վրա, ինչ Ռուսաստանը վաճառում է ԱՄՆ-ին և այլ երկրներին, եթե Ուկրաինայի հետ շուտով խաղաղության համաձայնագիր ձեռք չբերվի:
