10.08.2026 | 10:03
4 խաղափուլից հետո երեք հայ շախմատիստ առաջատարների շարքում է. Եվրոպայի Մ20 առաջնություն
Անկարան Թրամփից ակնկալում է ԱՄՆ-ի պատժամիջոցների վերացում, ԵՄ-ից՝ սահմանափակումների չեղարկում․ Ֆիդան
Քաղաքականություն
24.01.2025 | 19:33
Անկարայի նկատմամբ ԵՄ սահմանափակումները պետք է վերացվեն։ Այս մասին Անկարայում ԵՄ դիվանագիտության ղեկավար Կալա Կալլասի հետ մամուլի ասուլիսում հայտարարել է Թուրքիայի ԱԳ նախարար Հաքան Ֆիդանը։
«Մենք ցանկանում ենք, որ ԵՄ-ի կողմից մեր երկրի նկատմամբ կիրառվող բոլոր սահմանափակող միջոցները չեղարկվեն: Մաքսային միության արդիականացման բանակցությունները պետք է սկսել առանց հապաղելու։ Այսպիսով, Թուրքիա-ԵՄ հարաբերություններում դինամիկ գործընթաց սկսելն ավելի հեշտ կլինի։ Պետք է սկսել աշխատել վիզաների ազատականացման ուղղությամբ և արագ արդյունքի հասնել»,- ասել է նա:
Թուրքիայի ԱԳ նախարարն անդրադարձել է նաև ԱՄՆ նախագահ Դոնալդ Թրամփի նոր վարչակազմից Անկարայի ակնկալիքներին։
«ԱՄՆ-ի կողմից Սիրիայում և Իրաքում Թուրքիայի զգայուն հարցերը չհարգելը հանգեցրել է անվտանգության ճգնաժամի մեր երկկողմ հարաբերություններում։ Չնայած դրան՝ մենք կարևոր քայլեր ենք ձեռնարկել այլ ոլորտներում համագործակցությունն ընդլայնելու ուղղությամբ։ Դոնալդ Թրամփի վարչակազմից մեր ակնկալիքն այն է, որ այն կվերացնի նախկին վարչակազմից մնացած խնդիրները, հատկապես, CAATSA-ի պատժամիջոցները»,- հայտարարել է Հաքան Ֆիդանը։
Խոսքը պաշտպանական ոլորտին առնչվող պատժամիջոցների մասին է, որն ԱՄՆ-ն սահմանել է Թուրքիայի դեմ ռուսական C-400 ՀՕՊ համակարգերի գնման պատճառով։
Թարգմանությունը՝ Էմմա Չոբանյանի
