20.02.2026 | 02:07
Ադելիա Պետրոսյանը մեդալ չնվաճեց ձմեռային Օլիմպիական խաղերում
Օրբանը ՌԴ-ի դեմ ԵՄ պատժամիջոցներին աջակցելու համար պայման է առաջ քաշում
Քաղաքականություն
24.01.2025 | 19:01
Հունգարիան չի աջակցի Ռուսաստանի դեմ ԵՄ պատժամիջոցների երկարաձգմանը, քանի դեռ ԵՄ-ն չի հասել Կիևի կողմից Ուկրաինայի տարածքով ռուսական գազի տարանցման վերականգնմանը։ Այս մասին հունգարական ռադիոյի եթերում հայտարարել է երկրի վարչապետ Վիկտոր Օրբանը, փոխանցում է DW-ի ռուսական ծառայությունը։
Ըստ նրա՝ Մոսկվայի դեմ ԵՄ պատժամիջոցների պատճառով Հունգարիան կորցրել է մոտ 19 մլրդ եվրո։
«Լավ չէ, որ մենք վճարում ենք պատժամիջոցների տնտեսական հետևանքների համար, որպեսզի օգնենք Ուկրաինային, մինչդեռ նրանք երես են թեքում և մեզ մանիպուլյացիայի են ենթարկում»,- ասել է Օրբանը։
Եվրամիության երկրների ԱԳ նախարարների առաջիկա գագաթնաժողովը տեղի կունենա հունվարի 27-ին Բրյուսելում։ Ակնկալվում է, որ մասնակիցները կքննարկեն ուկրաինական պատերազմի համար Ռուսաստանի դեմ սահմանված պատժամիջոցների երկարաձգման հարցը։ Օրբանը նախկինում բազմիցս փորձել է արգելափակել Մոսկվայի դեմ նոր սահմանափակումները՝ պահանջելով տարբեր զիջումներ։
«Հիմա օրակարգում է պատժամիջոցների երկարաձգման հարցը, և ես արգելակել եմ ու խնդրել եմ եվրոպացի առաջնորդներին հասկանալ, որ դա չի կարող շարունակվել։ Ես ասել եմ գործընկերներին՝ խնդրում եմ, հասկացե՛ք, մենք օգնություն ենք խնդրում։ Մենք խնդրում ենք, որ ստիպեն ուկրաինացիներին վերականգնել գազատարի աշխատանքը»,- ասել է Հունգարիայի վարչապետը։
2025 թվականի հունվարի 1-ից ամբողջությամբ դադարեցվել է ռուսական գազի տարանցումը Եվրոպա Ուկրաինայի տարածքով։ Կիևը «Գազպրոմի» հետ պայմանագիրը երկարաձգելուց իր հրաժարումը հիմնավորել է «ազգային անվտանգության շահերով»։
Հունգարիան շարունակում է ռուսական գազ ստանալ «Թուրքական հոսք» գազատարով։
Թարգմանությունը՝ Էմմա Չոբանյանի
