08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
Կրեմլը ցանկանում է վերսկսել զինաթափման հարցերի շուրջ բանակցությունները ԱՄՆ-ի հետ
Քաղաքականություն
24.01.2025 | 17:17
ՌԴ նախագահի մամուլի քարտուղար Դմիտրի Պեսկովը հայտարարել է, որ Ռուսաստանն անհրաժեշտ է համարում վերսկսել ԱՄՆ-ի հետ զինաթափման հարցերի շուրջ բանակցությունները։ Դա բխում է ամբողջ աշխարհի և երկու երկրների ժողովուրդների շահերից, նշել է Պեսկովը։ Նա, միաժամանակ, շեշտել է, որ երկխոսությունը չի սահմանափակվել Ռուսաստանի կողմից, և այժմ «գնդակն ամերիկացիների դաշտում է», փոխանցում է Կոմերսանտը։
«Մենք պետք է խոսենք դրա մասին: Ժամանակի մեծ մասը բաց է թողնվել, և այստեղ գնդակն ամերիկացիների դաշտում է, որոնք դադարեցրել են բոլոր առարկայական շփումները մեզ հետ»,- ասել է Կրեմլի ներկայացուցիչը մամուլի ասուլիսի ժամանակ։
Նա նաև նշել է, որ սպառազինությունների վերահսկման իրավական դաշտը խաթարվել է ո՛չ Ռուսաստանի մեղքով։
Դմիտրի Պեսկովն ընդգծել է, որ ներկա պայմաններում անհրաժեշտ է հաշվի առնել աշխարհի երկրների միջուկային բոլոր ներուժը։
«Անհնար է, օրինակ, զրույց ունենալ և հաշվի չառնել Ֆրանսիայի և Մեծ Բրիտանիայի միջուկային ներուժը։ Ներկայիս իրողությունները թելադրում են նման անհրաժեշտություն»,- հավելել է նա։
ԱՄՆ նախագահ Դոնալդ Թրամփը նախօրեին ասել է, որ կցանկանար տեսնել Ռուսաստանի, ԱՄՆ-ի և Չինաստանի միջուկային զինանոցների կրճատում։ Նրա խոսքով՝ իրադարձությունների նման զարգացումը «միանգամայն հնարավոր է»։ Նա նաև պնդել է, որ Ռուսաստանի նախագահ Վլադիմիր Պուտինին դուր է եկել այս նախաձեռնությունը։
Թարգմանությունը՝ Տաթև Ֆռանգյանի
