Թրամփն առաջարկում է նվազեցնել նավթի գները․ ըստ նրա՝ դա կհանգեցնի ռուս-ուկրաինական պատերազմի ավարտին

ԱՄՆ նախագահ Դոնալդ Թրամփը հայտարարել է, որ Ուկրաինայի դեմ Ռուսաստանի պատերազմի խաղաղ կարգավորման ուղղությամբ աշխատանքներն արդեն սկսվել են, գրում է DW-ի ռուսական ծառայությունը։

Դավոսի Համաշխարհային տնտեսական ֆորումում տեսակապով ունեցած ելույթում նա, միաժամանակ, հայտարարել է, որ Ուկրաինայի դեմ Ռուսաստանի պատերազմի շարունակմանը նպաստում են նավթի ներկայիս բարձր գները։ Նա կոչ է արել նվազեցնել դրանք՝ ռազմական գործողությունները շուտափույթ ավարտին հասցնելու համար։

«Ես կխնդրեմ Սաուդյան Արաբիային և ՕՊԵԿ-ին նվազեցնել նավթի գինը։ Եթե գինը իջնի, Ռուսաստանի և Ուկրաինայի միջև պատերազմն անմիջապես կավարտվի»,- նշել է ԱՄՆ նախագահը։

Նավթի գինը ներկայում կազմում է մեկ բարելի դիմաց մոտ 80 դոլար։ Թրամփի ելույթի ժամանակ դրա արժեքը նվազել է գրեթե մեկ դոլարով:

ԱՄՆ նախագահը նաև հայտարարել է, որ կցանկանար առաջիկայում հանդիպել ՌԴ նախագահ Վլադիմիր Պուտինին՝ Ուկրաինայում պատերազմն ավարտելու համար։

«Ես իսկապես կցանկանայի առաջիկայում հանդիպել նախագահ Պուտինին՝ այս պատերազմին վերջ տալու համար: Եվ դա ոչ թե տնտեսագիտության կամ որևէ այլ բանի տեսանկյունից է: Դա միլիոնավոր կյանքերի վատնման տեսանկյունից է»,- ասել է նա։

Թրամփին հարցրել են՝ արդյո՞ք կարծում է, որ Ռուսաստանը և Ուկրաինան կհասնեն խաղաղության համաձայնագրի մինչև հաջորդ տարի գագաթնաժողովում նա նորից ելույթ ունենա:

«Դա պետք է հարցնեք Ռուսաստանին, Ուկրաինան պատրաստ է գործարքի գնալ»,- պատասխանել է ԱՄՆ նախագահը։

Նա մանրամասներ չի հայտնել Կիևի և Մոսկվայի միջև հնարավոր բանակցությունների մասին։

Միաժամանակ, Թրամփը հույս է հայտնել, որ Չինաստանը կօգնի դադարեցնել Ուկրաինայի դեմ ՌԴ-ի պատերազմը։ Նա հայտարարել է, որ Պեկինի և Վաշինգտոնի հարաբերությունները «շատ լավն են»:

«Չինաստանն ունի բավականաչափ ուժ, որպեսզի ազդի Ռուսաստանի վրա՝ պատերազմն անհապաղ դադարեցնելու համար: Մենք դա կանենք Չինաստանի հետ միասին»,- ասել է ԱՄՆ նախագահը։

Թրամփը նաև հայտարարել է՝ ակնկալում է խոշոր օտարերկրյա ներդրումներ ամերիկյան տնտեսության մեջ։

«Իմ ուղերձը հստակ է՝ եկեք և ձեր ապրանքները արտադրեք Ամերիկայում։ Հակառակ դեպքում ներմուծվող ապրանքների վրա մաքսատուրքեր կլինեն, Միացյալ Նահանգները լավագույն տեղն է աշխատատեղեր ստեղծելու և նոր գործարաններ կառուցելու համար»,- նշել է նա՝ հայտնելով, որ Սաուդյան Արաբիան արդեն հայտարարել է 600 միլիարդ դոլարի ներդրումների մասին ԱՄՆ-ում:

Սակայն ԱՄՆ նախագահը կարծում է, որ այդ թիվը պետք է տրիլիոնի հասցվի, քանի որ ԱՄՆ-ը «շատ բարի» է գտնվել Սաուդյան Արաբիայի նկատմամբ:

Թարգմանությունը՝ Էմմա Չոբանյանի