Քաղաքականություն
23.01.2025 | 14:40
ԱՄՆ նորանշանակ պետքարտուղար Մարկ Ռուբիոն ծրագրում է հաջորդ շաբաթ այցելել Պանամա՝ երկիր, որի ջրանցքը գրավելու առաջարկ է արել նախագահ Դոնալդ Թրամփը։ Այս մասին POLITICO-ին են հայտնել ծրագրին ծանոթ ամերիկացի երեք պաշտոնյաներ։
Ըստ աղբյուրների՝ Ռուբիոյի ուղևորությունը, որը նախատեսված է հունվարի վերջին և փետրվարի սկզբին, ներառում է նաև Գվատեմալան, Էլ Սալվադորը, Կոստա Ռիկան և Դոմինիկյան Հանրապետությունը։
Ակնկալվում է, որ այս ուղևորությունը կլինի Ռուբիոյի առաջին արտասահմանյան ճանապարհորդությունը որպես պետքարտուղար։ Աղբյուրները նաև ընդգծել են, որ ճամփորդական ծրագրերը նախնական են։
Չորեքշաբթի ուշ երեկոյան Պետքարտուղարության խոսնակ Թեմմի Բրյուսը հաստատել է ճանապարհորդության ընդհանուր պլանը և նշել, որ Ռուբիոն նախընտրում է առաջնահերթություն տալ Արևմտյան կիսագնդին, քանի որ «դա այնտեղ է, որտեղ իրենք ապրում են»:
«Մենք չենք շարունակի անտեսել տարածաշրջանը, ինչպես դա արել են մյուս վարչակազմերը։ Մեր հարևանների հետ շփումը կենսական տարր է միգրացիային, մատակարարման շղթաներին և տնտեսական աճին անդրադառնալու համար, որոնք առանցքային են պետքարտուղար Ռուբիոյի արտաքին քաղաքականության համար՝ ուղղված Ամերիկան ուժեղ, բարգավաճ և անվտանգ դարձնելուն»,- ասել է նա։
Սպասվում է, որ Ռուբիոն կօգտագործի ուղևորությունը MAGA-ի արտաքին քաղաքականության օրակարգի առնվազն երկու հարց քննարկելու համար՝ անօրինական ներգաղթի կրճատում և Պանամայի ջրանցքը վերադարձնելու՝ Թրամփի ջանքերը։
Պանամայի պաշտոնյաները, մինչդեռ, վրդովված են ռազմավարական կարևոր ջրանցքի վերաբերյալ Թրամփի մեկնաբանությունների կապակցությամբ:
«Պանամայի ջրանցքը պատկանում է Պանամային և կշարունակի պատկանել Պանամային։ Ջրանցքը զիջում կամ նվեր չէ Միացյալ Նահանգներից»,- հայտարարել է Պանամայի նախագահ Խոսե Ռաուլ Մուլինոն Դավոսում Համաշխարհային տնտեսական ֆորումի ժամանակ:
Այլ երկրներ, ուր Ռուբիոն նախատեսում է այցելել, ներառյալ՝ Գվատեմալան և Էլ Սալվադորը, ծառայում են որպես հիմնական տարանցիկ կետեր միգրանտների համար, որոնք փորձում են հասնել ԱՄՆ հարավային սահման:
Թարգմանությունը՝ Էմմա Չոբանյանի
