«Գազպրոմ»-ից հետո զանգվածային կրճատումներ է սկսել նաև «Սբերբանկ»-ը

Ռուսական «Սբերբանկ»-ն աշխատակիցների զանգվածային կրճատումներ է սկսել իր դուստր ձեռնարկություններում, ինչպիսիք են «Կուպերե»-ն, «ՄեգաՄարկետ»-ը, «ՍբերԼոգիստիկս»-ը և «Սամոկատ»-ը։ Բոլոր 4 ստորաբաժանումներն էլ ներառված են Ecom.tech-ի կազմում, որը որոշումներ է մշակում e-commerce-ի համար։ Առաջին հերթին բանկը որոշել է ազատվել ծրագրավորողներից ու մշակողներից, հայտնում է Cnews-ը։

Ecom.tech-ի բաժանմունքներից մեկի ղեկավարը պարբերականին հայտնել է, որ «Կուպերե»-ում արդեն աշխատանքից ազատել են ՏՏ ոլորտի մասնագետների 20%-ին (1000-ից շուրջ 200-ին)՝ սա բացատրելով «բյուջեի խնայողությամբ ու վերևից հրամանով»։ Նրա խոսքով՝ աշխատակիցներին առաջարկում են հեռանալ կողմերի համաձայնությամբ։

Ecom.tech-ի մեկ այլ աղբյուր հայտնել է, որ աշխատանքից ազատումները սկսվել են դեռ դեկտեմբերին, և որ միայն «ՄեգաՄարկետ»-ը պատրաստվում է կրճատել իր աշխատակիցների մինչև 25%-ին:

«Սբերբանկ»-ից այս կապակցությամբ պաշտոնական հայտարարություն չկա։

Փորձագետները կարծում են, որ ռուս ՏՏ մասնագետները կանգնած են Ուկրաինայի հետ պատերազմի հետևանքով առաջացած տնտեսական անկայունության հետևանքների առաջ։ Ընկերությունները զանգվածաբար աշխատանքից ազատում են նման մասնագետների՝ առևտրային հարաբերությունների խաթարումների, ներմուծվող տեխնոլոգիաների թանկացման և Կենտրոնական բանկի ռեկորդային հիմնական դրույքաչափի (21%) պատճառով, ինչը բարդացրել է երկարաժամկետ ՏՏ նախագծերի պլանավորումն ու իրականացումը։

Թարգմանությունը՝ Տաթև Ֆռանգյանի