08.09.2026 | 23:30
Պապիկյանը այցելել է ՊՆ ուսումնական կենտրոն, հրամկազմին տրվել են մի շարք հանձնարարականներ
Ավիաաղետի ապացույցներն ակնհայտ են, կարևոր է ճնշում գործադրել ՌԴ-ի վրա․ Զելենսկին՝ Ալիևին
Քաղաքականություն
22.01.2025 | 19:23
Ուկրաինայի նախագահ Վլադիմիր Զելենսկին և Ադրբեջանի նախագահ Իլհամ Ալիևը Դավոսում Համաշխարհային տնտեսական ֆորումի շրջանակում տեղի ունեցած հանդիպմանը քննարկել են նաև ադրբեջանական օդանավի ավիաաղետը։ Այս մասին հայտնել է Զելեսնկին տելեգրամի իր ալիքում։
«Ադրբեջանի նախագահ Իլհամ Ալիևի հետ հանդիպման ժամանակ ևս մեկ անգամ ցավակցություն եմ հայտնել «Ադրբեջանական ավիաուղիների» օդանավի կործանման և զոհերի կապակցությամբ։ Վթարի վայրից ապացույցներն ակնհայտ են, կարևոր է ճնշում գործադրել Ռուսաստանի վրա՝ ստիպելու նրան ասել ճշմարտությունը»,- նշել է Զելենսկին՝ հավելելով, որ քննարկել են նաև երկկողմ հարաբերությունները և դրանց հետագա զարգացումը, ապագայում պետությունների միջև ապրանքաշրջանառության ավելացման և էներգետիկ ոլորտում համագործակցության հարցեր։
Ուկրաինայի նախագահը նաև ընդգծել է, որ բարձր են գնահատում Ադրբեջանի օգնությունը Կիևին։
Հավելենք, որ ադրբեջանական կողմի հաղորդագրության մեջ ավիաաղետի քննարկման մասին տեղեկություն չէր հաղորդվել։
Հիշեցնենք, որ դեկտեմբերի 25-ին Բաքվից Գրոզնի թռչող ադրբեջանական Embraer ինքնաթիռը վթարի էր ենթարկվել Ղազախստանի Ակտաու քաղաքի մոտակայքում։ Ադրբեջանի նախագահ Իլհամ Ալիևը ՌԴ-ին է մեղադրել օդանավի կործանման մեջ, պահանջել ներողություն խնդրել, ընդունել մեղքը, մեղավորներին պատասխանատվության ենթարկել ու փոխհատուցում վճարել։
Թարգմանությունը՝ Էմմա Չոբանյանի
