08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
Սիրիան խզել է Ռուսաստանի հետ Տարտուս նավահանգստի կառավարման 49-ամյա ժամկետով պայմանագիրը
Քաղաքականություն
22.01.2025 | 12:58
Սիրիայի նոր իշխանությունները խզել են պայմանագիրը ռուսական ընկերության հետ՝ Միջերկրական ծովի Տարտուս նավահանգստի կառավարման վերաբերյալ։ Մասնավորապես, սիրիական al-Watan թերթը, հղում անելով մաքսային վարչության տնօրեն Ռիադ Ջուդիին, հայտնել է, որ սիրիական իշխանությունների և ռուսական «Ստրոյտրանսգազ» ընկերության միջև Տարտուս նավահանգստի կառավարման մասին համաձայնագիրը չեղարկվել է։ Պայմանագրի խզման ամսաթիվը հրապարակման մեջ նշված չէ, փոխանցում է BBC-ի ռուսական ծառայությունը։
Ներդրումային պայմանագիրը կնքվել է 2019 թվականին՝ 49 տարի ժամկետով։ Ըստ դրա պայմանների՝ Մոսկվան ստացել էր նավահանգիստը կառավարելու իրավունք և պետք է ավելի քան 500 մլն դոլար ներդներ դրա արդիականացման համար։
Ռուսաստանը նավահանգիստն օգտագործում է ռազմական նպատակներով դեռևս խորհրդային ժամանակներից՝ 1971 թվականից։ Ներկայում Տարտուսում տեղակայված է ՌԴ նավատորմի ռազմածովային նյութատեխնիկական ապահովման կենտրոնը, որը միակ ռուսական ռազմածովային հաստատությունն է Միջերկրական ծովում:
2024 թվականի վերջին՝ Սիրիայի նախագահ Բաշար Ասադի տապալումից մի քանի օր առաջ, ռուսական նավերը հեռացել էին Տարտուսից։ Ավելի ուշ ՌԴ ԱԳՆ-ն հայտարարել էր, որ Ռուսաստանը կցանկանար Սիրիայում իր բազաները պահպանել նաև երկրում իշխանափոխությունից հետո։
Թարգմանությունը՝ Էմմա Չոբանյանի
