09.09.2026 | 15:33
ՊԵԿ-ը ստուգել է Նարեկ Նալբանդյանի բիզնեսները․ ՏԵՍԱՆՅՈւԹ
Թրամփը ԵՄ-ին և Չինաստանին նոր մաքսատուրքերով է սպառնում
Քաղաքականություն
22.01.2025 | 12:40
ԱՄՆ նախագահ Դոնալդ Թրամփը Եվրամիությանը կրկին առևտրային մաքսատուրքերով է սպառնում, գրում է DW-ի ռուսական ծառայությունը։
«Նրանք մեզ հետ շատ, շատ վատ են վարվել: Այսպիսով, նրանք պետք է պատրաստ լինեն մաքսատուրքերին: Դա արդարության հասնելու միակ ճանապարհն է», – ասել է Թրամփը Սպիտակ տանը մամուլի ասուլիսում:
Հանրապետական գործիչը դժգոհություն է հայտնել առևտրի դեֆիցիտի կապակցությամբ և նշել, որ Եվրամիությունը հրաժարվում է գնել ամերիկյան մեքենաներ և գյուղմթերք։ Ավելի վաղ Թրամփը նաև կոչ էր արել ԵՄ երկրներին ավելացնել ԱՄՆ-ից նավթի և գազի ներկրումը։
Նախագահի պաշտոնում իր առաջին ժամկետում Դոնալդ Թրամփը լրացուցիչ մաքսատուրքեր էր սահմանել պողպատի և ալյումինի ներկրման համար, ինչը հանգեցրել է ԱՄՆ-ի և Եվրամիության միջև սուր առևտրային հակամարտության: Ի պատասխան՝ ԵՄ-ն հատուկ մաքսատուրքեր է սահմանել մի շարք ամերիկյան ապրանքների, այդ թվում՝ վիսկիի, Harley-Davidson մոտոցիկլետների և Levi Strauss-ի հագուստի վրա։
Դոնալդ Թրամփը նաև ասել է, որ իր վարչակազմը քննարկում է փետրվարի 1-ից Չինաստանից ներմուծվող ապրանքների վրա 10 տոկոս մաքսատուրքեր սահմանելու հարցը: Որպես պատճառ՝ նա նշել է ֆենտանիլ սինթետիկ թմրանյութի մաքսանենգությունը Չինաստանից Մեքսիկայի և Կանադայի տարածքով Միացյալ Նահանգներ, որը տարեկան հազարավոր ամերիկացիների կյանքեր է խլում։
Թարգմանությունը՝ Տաթև Ֆռանգյանի
