10.08.2026 | 17:11
Պատրա՞ստ եք հրապարակել 44-օրյա պատերազմի հանգամանքներն ուսումնասիրող հանձնաժողովի զեկույցը. Մանուկյանը՝ Գաբրիելյանին. ՏԵՍԱՆՅՈՒԹ
Ինչպես է անցել Իսրայելի և ՀԱՄԱՍ-ի միջև փխրուն հրադադարի առաջին օրը․ BBC-ի անդրադարձը
Քաղաքականություն
20.01.2025 | 11:31
«15 ամիս տևած պատերազմից հետո, որը սկսվել է Իսրայելի վրա ՀԱՄԱՍ-ի գրոհից հետո ու ավարտվել նրանով, որ իսրայելական զորքերը հողին են հավասարեցրել Գազայի հատվածի մեծ մասը, կիրակի օրը ուժի մեջ է մտել հրադադարը, որի արդյունքում գերությունից ազատվել են 3 իսրայելցի կանայք, իսկ իսրայելական բանտերից՝ 90 պաղեստինցի»,- գրում է BBC-ի ռուսական ծառայությունը։
Կիրակի առավոտյան երկու լարված ժամերի ընթացքում թվում էր, թե հրադադարը կարող է միանգամից խափանվել։ ՀԱՄԱՍ-ը չէր կարողանում հրապարակել գերիների անունները, որոնց պլանավորում էր ազատ արձակել, ինչը դրդում էր Իսրայելին հետաձգել հրադադարը ու շարունակել Գազային ավիահարվածները։
Զինադադարի առաջին ժամերին՝ տեղական ժամանակով ժամը 08:30-ից սկսած, հարվածների հետևանքով զոհվել է առնվազն 19 պաղեստինցի, ևս 36-ը վիրավորվել է, հայտնել է ՀԱՄԱՍ-ի կողմից վերահսկվող Գազայի քաղաքացիական պաշտպանության վարչությունը: Իսրայելի պաշտպանության բանակը հայտարարել է, որ հարվածներ է հասցրել «ահաբեկիչների մի շարք օբյեկտների»:
Երեք պատանդների անուններն ի վերջո ՀԱՄԱՍ-ի կողմից ուղարկվեցին Իսրայել՝ միջնորդների միջոցով, և Գազայում ռազմական գործողությունները դադարեցվեցին 2023 թվականի նոյեմբերի կարճատև մեկշաբաթյա զինադադարից հետո առաջին անգամ:
Կիրակի ժամը 11:19-ին Կատարի արտգործնախարարության խոսնակ Մաջիդ ալ-Անսարին (Կատարը հրադադարի բանակցություններում միջնորդն էր) X սոցիալական ցանցում գրել է, որ վերջնական խոչընդոտները վերացվել են, և զինադադարը սկսվել է:
Վեց ժամ անց երեք իսրայելցի պատանդներ՝ 24-ամյա Ռոմի Գոնենը, 31-ամյա Դորոն Շտայնբրեխերը և 28-ամյա Էմիլի Դամարին, որը բրիտանաիսրայելական քաղաքացիություն ունի, ՀԱՄԱՍ-ի զինյալները հանձնել են Կարմիր խաչին։ Գազայից իսրայելական զորքերը նրանց տարել են մոտակայքում գտնվող Ռեյիմ ռազմաբազա, որտեղ նրանց դիմավորել են մայրերը: Իսրայելի պաշտպանության բանակը մանրակրկիտ պլանավորել էր այս նուրբ գործողությունը. ռազմական բժիշկներն ու հոգեբաններն արդեն պատրաստ էին հատուկ կենտրոնում ընդունել պատանդներին։
Ռեյմի բազայից նրանք ուղղաթիռով տեղափոխվել են Թել Ավիվի մոտ գտնվող «Շեբա» բժշկական կենտրոն, որտեղ նրանք վերամիավորվել են իրենց ընտանիքների հետ և ստացել հետագա բժշկական օգնություն: Հաղորդվում է, որ երեք պատանդներից երկուսը գնդակահարվել են 2023 թվականի հոկտեմբերի 7-ին տեղի ունեցած հարձակման ժամանակ։
Թարգմանությունը՝ Տաթև Ֆռանգյանի
