Քաղաքականություն
19.01.2025 | 15:21
Երևանի ավագանու «Հանրապետություն» խմբակցությունը չի մասնակցի Երևանի ավագանու հունվարի 21-ին հրավիրվող արտահերթ նիստին։ Այս մասին կուսակցությունը տարածել է հայտարարություն։
«Մենք հասարակությունը բևեռացնող և Երևանի զարգացմանը խոչընդոտող կեղծ օրակարգեր չենք քննարկում։ Մենք հասկանում ենք, որ տրանսպորտային միասնական համակարգի յուրացման հարցում ամեն օր բոլորս բախվում ենք տարբեր խնդիրների: Շնորհակալ ենք ձեր բարձրացրած հարցերի համար, որոնք քաղաքային իշխանությունը քննարկում է ու լուծումներ գտնում»,- ասված է հաղորդագրությունում։
Հիշեցնենք, որ ավելի վաղ Երևանի ավագանու «Մայր Հայաստան» խմբակցությունը նախաձեռնել է ստորագրահավաք՝ ավագանու արտահերթ նիստ գումարելու համար, որի ժամանակ պետք է քննարկվի տրանսպորտի թանկացման հարցը։ Ավելի ուշ խմբակցության անդամ Գևորգ Ստեփանյանը հայտարարել էր, որ արտահերթ նիստ գումարելու համար անհրաժեշտ 22 ստորագրության փոխարեն հավաքել են 23 ստորագրություն։
«Մայր Հայաստան» խմբակցության նախաձեռնած ստորագրահավաքին միացել են «Ազգային առաջընթաց» խմբակցության անդամներ և ավագանու երկու անկախ անդամ։ Ավագանու արտահերթ նիստը նշանակված է հունվարի 21-ին՝ ժամը 10։00-ին։ Այն կկայանա, եթե քվորում ապահովվի, այսինքն՝ դահլիճում ներկա լինեն 65 ավագանու անդամներից առնվազն 33-ը։
