06.10.2026 | 14:23
Ռաֆինյան երկարաձգել է «Բարսելոնայի» հետ պայմանագիրը. Աղբյուր
Նավալնիի փաստաբանները «ծայրահեղական համայնքի» գործով դատապարտվել են 3,5-ից 5,5 տարվա ազատազրկման
Քաղաքականություն
17.01.2025 | 19:28
Վլադիմիրի մարզի Պետուշինսկի շրջանային դատարանը բանտում մահացած ընդդիմադիր գործիչ Ալեքսեյ Նավալնիի փաստաբաններին դատապարտել է «ծայրահեղական համայնքին» մասնակցելու գործով (Քրեական օրենսգրքի 282.1 հոդվածի 2-րդ մաս): Վադիմ Կոբզևը դատապարտվել է 5,5 տարվա ազատազրկման ընդհանուր ռեժիմի գաղութում, Ալեքսեյ Լիպցերը՝ 5, իսկ Իգոր Սերգունինը՝ 3,5 տարվա ազատազրկման, հայտնում է Mediazona-ն։
Պատիժը կրելուց հետո երեք տարի դատարանը երեքին էլ արգելել է զբաղվել փաստաբանական գործունեությամբ։
«Տղե՛րք, դուք հերոսներ եք, մենք հպարտանում ենք ձեզանով։ Դուք Ռուսաստանի լավագույն մարդիկ եք»,- բղավել են նիստին ներկաները։
Պետական մեղադրողը Կոբզևի համար պահանջել է 5 տարի 11 ամիս, Լիպցերի համար՝ 5 տարի 10 ամիս, իսկ Սերգունինին՝ 5 տարի 6 ամիս։ Այս ժամկետները մոտ են վերագրվող հոդվածով հնարավոր առավելագույնին՝ վեց տարվան։
Փաստաբանները բերման են ենթարկվել 2023 թվականի հոկտեմբերի 13-ի առավոտյան՝ նրանց տները խուզարկելուց հետո։ Նրանք մեղադրվել են «ծայրահեղական համայնքին մասնակցելու մեջ», որը Ռուսաստանի իշխանությունները համարում են Հակակոռուպցիոն հիմնադրամը (FBK):
Թարգմանությունը՝ Տաթև Ֆռանգյանի
