30.04.2026 | 10:10
Դրամն արժևորվել է․ արտարժույթների փոխարժեքները՝ ապրիլի 30-ի դրությամբ
ՌԴ ՊՆ-ն հայտարարել է ԱԹՍ-ներով «Թուրքական հոսքի» վրա հարձակման մասին
Քաղաքականություն
13.01.2025 | 14:14
ՌԴ Պաշտպանության նախարարությունը հայտարարել է, թե ուկրաինական անօդաչու թռչող սարքերը փորձել են գրոհել Կրասնոդարի երկրամասում գտնվող «Ռուսսկայա» կոմպրեսորային կայանի ենթակառուցվածքը, որը գազ է մատակարարում «Թուրքական հոսք» խողովակաշարով, գրում է Meduza-ն։
Նշվում է, որ ԱԹՍ-ների հարձակումը տեղի է ունեցել հունվարի 11-ին։ Կայանը գտնվում է Գայ-Կոձոր գյուղում։
Ըստ ՌԴ ՊՆ-ի՝ բոլոր անօդաչու սարքերը խոցվել են։ ԱԹՍ-ի բեկորների անկման հետևանքով գազաչափ կայանի շենքն ու սարքավորումները «չնչին վնասներ» են կրել։ Սարքավորումներն արդեն վերականգնվել են, անձնակազմի շրջանում տուժածներ չկան, հավելել են գերատեսչությունից։
Ռուսաստանի ՊՆ-ն պնդում է, թե հարձակման նպատակն է եղել դադարեցնել գազի մատակարարումը եվրոպական երկրներ։
«Կոմպրեսորային կայանը բնականոն ռեժիմով գազ է մատակարարում «Թուրքական հոսք» գազատարին։ Շահագործման ընթացքում խափանումներ չեն եղել»,- ասվում է հաղորդագրության մեջ։
Հավելենք, որ հունվարի 1-ից դադարեցվել է ռուսական գազի տարանցումը Ուկրաինայի տարածքով։ Այժմ Ռուսաստանից Եվրոպա գազ կարող է արտահանվել միայն Թուրքիայի տարածքով։
Ուկրաինական կողմը դեռևս չի մեկնաբանել ՌԴ ՊՆ-ի այս հայտարարությունը։
Թարգմանությունը՝ Էմմա Չոբանյանի
