25.06.2026 | 04:04
ԱԱ-2026. Բրազիլիան հաղթեց խոշոր հաշվով, Մարոկկոն ևս փլեյ-օֆֆում է. ՏԵՍԱՆՅՈՒԹ
ԵՄ-ում մտավախություն ունեն, որ Թրամփը կչեղարկի ՌԴ-ի դեմ Բայդենի վարչակազմի սահմանած պատժամիջոցները․ FT
Քաղաքականություն
10.01.2025 | 15:17
ԵՄ պաշտոնյաները վերլուծում են հարյուրավոր գործադիր հրամաններ և պատժամիջոցներ, որոնք սահմանվել են ԱՄՆ նախագահ Ջո Բայդենի կողմից՝ աճող մտավախությունների ֆոնին, որ նորընտիր նախագահ Դոնալդ Թրամփը կչեղարկի դրանք, որը կարող է վնասել միջազգային հարաբերություններին ու առևտրին, գրում է Financial Times-ը։
Բրյուսելն անհանգստացած է, որ Թրամփը կարող է փորձել չեղարկել իր նախորդի որոշումները պարզապես այն պատճառով, որ դրանք ընդունվել են Բայդենի կողմից՝ առանց մեծ ուշադրություն դարձնելու եվրոպական դաշնակիցների վրա նման քայլերի ազդեցությանը:
Եվրահանձնաժողովի բարձրաստիճան պաշտոնյաները հրահանգել են վերանայել Բայդենի հրամանները՝ սկսած Ռուսաստանի դեմ պատժամիջոցներից մինչև առևտուր և կիբերանվտանգություն, որպեսզի տեսնեն, թե որ չեղարկումները կարող են ամենամեծ ազդեցությունն ունենալ դաշինքի վրա, լրատվամիջոցին հայտնել են իրավիճակին ծանոթ երեք աղբյուրներ։
Հունվարի 20-ին Թրամփի երդմնակալությանն ընդառաջ շտապողականությունն ընդգծում է ԵՄ-ի անորոշությունը նորընտիր նախագահի հավանական գործողությունների վերաբերյալ, երբ նա վերադառնա Սպիտակ տուն՝ ԱՄՆ-ի մերձավոր դաշնակիցների հասցեին արդեն իսկ հնչեցրած սպառնալիքներից հետո: Վերջին օրերին Թրամփը հրաժարվել է բացառել ռազմական ուժի կիրառումը կամ Դանիայի նկատմամբ մաքսատուրքերի սահմանումը, որպեսզի ստիպի վաճառել Գրենլանդիան: Նա նաև առաջարկել է, որ Կանադան դառնա Միացյալ Նահանգների մաս, ինչպես նաև վերահսկել Պանամայի ջրանցքը:
Պաշտոնյաների խոսքով՝ ԵՄ-ի ամենամեծ մտահոգությունն այն է, որ Թրամփը կչեղարկի Բայդենի բազմաթիվ գործադիր հրամանները, որոնք պատժամիջոցներ են սահմանել Ռուսաստանի դեմ՝ 2022 թվականից ի վեր Ուկրաինա լայնամասշտաբ ներխուժման համար: Միության պաշտոնյաները հույս ունեն, որ Թրամփը կպահպանի այդ պատժամիջոցները, որպեսզի դրանք օգտագործի որպես պոտենցիալ լծակ Մոսկվայի հետ հրադադարի վերաբերյալ ցանկացած հնարավոր բանակցություններում:
Թրամփի անցումային թիմի մամուլի խոսնակն ասել է, որ նորընտիր նախագահը ստացել է «հզոր մանդատ՝ իրագործելու նախընտրական արշավի ժամանակ իր տված խոստումները և խախտելու Վաշինգտոնում ստատուս քվոն»:
Անցյալ ամառ Եվրահանձնաժողովը ստեղծել է բարձրաստիճան պաշտոնյաներից կազմված ներքին թիմ՝ Թրամփի երկրորդ նախագահության հնարավոր ազդեցությունների ռազմավարությունը մշակելու և դրանք զսպելու կամ արձագանքելու համար:
«Մտահոգությունն այն է, որ նա կորոշի իրավիճակը փոխել միայն այն պատճառով, որ Բայդենն է արել։ Մենք պետք է իմանան, թե ինչպես դա կարող է ազդել մեզ վրա»,- ասել է աղբյուրներից մեկը։
Թարգմանությունը՝ Էմմա Չոբանյանի
