Թուրքիան կիբերանվտանգության տնօրինություն է հիմնում տվյալների զանգվածային արտահոսքից հետո

Թուրքիան կիբերանվտանգության պետական տնօրինություն է ստեղծել՝ պաշտպանելու զգայուն տեղեկատվությունը և բարելավելու թվային անվտանգության ենթակառուցվածքը՝ երկրում միլիոնավոր մարդկանց վրա տարածված անձնական տվյալների խախտումների վերաբերյալ մտահոգությունների ֆոնին, գրում է Turkish Minute-ը։

Թուրքիայի նախագահ Ռեջեփ Թայիփ Էրդողանը պաշտոնական տեղեկագրում հրապարակված հրամանագրով ստեղծել է Կիբերանվտանգության տնօրինություն, կենտրոնակայանը՝ Անկարա։ Նորաստեղծ մարմինը նպատակ ունի մշակել և իրականացնել ազգային կիբերանվտանգության քաղաքականություն և ամրապնդել պետական ու հանրային թվային ծառայությունների պաշտպանությունը:

Դիտորդներն ասում են, որ գործակալությունը ստեղծվել է տվյալների զանգվածային արտահոսքերի դեմ պայքարի ջանքերի շրջանակում, որից երկիրը տուժել է վերջին տարիներին։

Տնօրինությունում աշխատելու է 135 մարդ, այդ թվում՝ 30 ինժեներ, տեխնիկ և տեխնոլոգ, այն գործելու է նախագահի աշխատակազմի անմիջական հսկողության ներքո։ Այն նաև իրավունք ունի բացել միջազգային գրասենյակներ։ Հիմնական պարտականությունները ներառելու են տվյալների հափշտակության կանխարգելման ռազմավարությունների մշակումը, հանրային իրազեկման խթանումը, ուսուցման ապահովումը և կիբերճգնաժամերի և արտակարգ իրավիճակների պլանավորումը:

Այս գերատեսչության ստեղծումը հաջորդել է մի շարք աղմկահարույց տվյալների արտահոսքին, որոնք բացահայտել են Թուրքիայի միլիոնավոր քաղաքացիների անձնական տվյալները՝ առաջացնելով հասարակության զայրույթը:

2024 թվականի սեպտեմբերին Կիբեր միջադեպերի արձագանքման ազգային կենտրոնը (USOM) պարզել էր, որ հաքերները Google Drive-ում ներբեռնել են զգայուն տվյալներ, ներառյալ՝ ավելի քան 108 միլիոն Թուրքիայի քաղաքացիների անունները, նույնականացման համարները, տան հասցեները և հեռախոսահամարները: Հաղորդվում է, որ գողացված տեղեկատվությունը վերցվել է կառավարության պաշտոնական տվյալների բազաներից։

Գլխավոր ընդդիմադիր Ժողովրդահանրապետական կուսակցության (CHP) պատգամավոր Օզգյուր Քարաբաթը վերջերս բացահայտել էր, որ թուրքերի անձնական տվյալները, որոնք պարունակում են ամբողջական հասցեներ և նույնականացման համարներ, առցանց վաճառվում են ընդամենը 5 դոլարով:

Կառավարությունը բախվում է աճող քննադատության՝ տվյալների գողությունը կանխելու անկարողության համար։

Թարգմանությունը՝ Էմմա Չոբանյանի