Դատախազությունն ընտրկաշառքի դեպքով արդեն չորս քրեական գործ է հարուցել. ՏԵՍԱՆՅՈՒԹ

Սեպտեմբերի 23-ի` ժամը 13:00-ի դրությամբ, ՀՀ գլխավոր դատախազությունում ընտրակաշառք տալու դեպքով 4 քրեական գործ է հարուցվել: Այս մասին ԿԸՀ մամուլի սրահում լրագրողների հետ հանդիպմանը նշեց ՀՀ գլխավոր դատախազության մինչդատական քրեական վարույթի օրինականության նկատմամբ վերահսկողության վարչության պետի տեղակալ Շուշանիկ Իսրայելյանը:

Դատախազության պաշտոնյայի ներկայացրած տվյալների համաձայն՝ մինչև սեպտեմբերի 23-ը` ժամը 8:00-ն, ՀՀ գլխավոր դատախազի հրամանով ստեղծված աշխատանքային խումբն ուսումնասիրել է մամուլի 15 հրապարակում, սոցցանցերում քաղաքացիերի կողմից արված 4 գրառում, մեկ դեպքով վարչական վարույթ է ձեռնարկվել, արձանագրվել է քաղաքացու կողմից ոստիկանություն դիմում-հաղորդում ներկայացնելու, ահազանգ կատարելու և ոստիկանության աշխատակցի զեկուցագիր ներկայացնելու 74 դեպք, ընդհանուր առմամբ՝ 94 դեպք:

Նշված առևերույթ իրավախախտումներից 19-ը վերաբերել է քաղաքացու ընտրական իրավունքի ազատ իրականացմանը խոչընդոտելուն, 21-ը՝ ընտրակաշառք տալուն, 4-ը՝ քարոզչություն կատարելուն հարկադրելուն, 49-ը՝ ընտրողների ցուցակները կազմելու կարգի խախտմանը, 1-ը՝ այլ դեպք: Նշվածներից 82-ով ենթադրյալ ընտրական իրավախախտման վերաբերյալ վերացական և ընդհանուր բնույթի տեղեկություններ են պարունակել, ոստիկանության կողմից ստուգողական գործողություններ են կատարվել: 9 դեպքով ՀՀ Քրեական դատավարության օրենսգրքի 180 և 181 հոդվածներով սահմանված կարգով նյութեր են նախապատրաստվում, ևս 3 դեպքով հարուցվել է քրեական գործ. երկուսը՝ ՀՀ Քրեական օրենսգրքի 154 պրիմ 2 հոդվածի 2-րդ մասով, մեկը՝ նույն հոդվածի 4-րդ մասի 2-րդ կետով:

Շուշանիկ Իսրայելյանի փոխանցմամբ՝ ընտրական իրավախախտումների մասին հիշյալ դեպքերից բացի՝ արձանագրվել է նաև ընտրությունների հետ կապված ենթադրյալ իրավախախտման ևս 2 դեպք. մեկը վերաբերում է լրագրողի գործունեությանը խոչընդոտելուն, մյուսը՝ ընտրություների հետ կապված բախման դեպք է՝ իշխանության ներկայացուցչի նկատմամբ բռնություն գործադրելու վերաբերյալ: Ժամը 13:00-ի դրությամբ էլ ուսումնասիրվել է մամուլի 29 հրապարակում, սոցցանցերում քաղաքացիների 4 գրառում, մեկ դեպքով վարչական վարույթ է հարուցվել: Արձանագրվել է նաև քաղաքացու կողմից ոստիկանություն դիմում-հաղորդում ներկայացնելու, ահազանգ կատարելու և ոստիկանության աշխատակցի զեկուցագիր ներկայացնելու 89 դեպք, ընդհանուր առմամբ՝ 123 հաղորդում:

Հիշյալ դեպքերից 106-ը պարունակել են վերացական և ընդհանուր բնույթի տեղեկություններ, 13 դեպքով ՀՀ Քրեական դատավարության օրենսգրքի 180 եւ 181 հոդվածներով սահմանված կարգով նախապատրաստվում են նյութեր, մեկ դեպքով հարուցվել է քրեական գործ՝ դարձյալ ընտրակաշառքի հատկանիշներով:

Այսպիսով, հարուցված բոլոր քրեական գործերը վերաբերում են ընտրակաշառք տալու դեպքերին: Դրանք ուղարկվել են ՀՔԾ՝ նախաքննություն կատարելու նպատակով:

Շուշանիկ Իսրայելյանը հավելեց նաև, որ գլխավոր դատախազությունը գլխավոր դատախազությունում թեժ գիծ է գործարկվել՝ 010 511 603 հեռախոսահամարով. այսօր այն կգործի շուրջօրյա ռեժիմով:

Մանրամասները՝ տեսանյութում