Իրանցի գեներալը խոսել է Սիրիայում ռազմավարական լուրջ պարտության մասին` ՌԴ-ին մեղադրելով բաց դաշտերը ռմբակոծելու մեջ

Իսլամական հեղափոխության պահապանների կորպուսի (ԻՀՊԿ) բրիգադային գեներալ Բեհրուզ Էսբաթին ասել է, որ Իրանը «մեծ պարտություն է կրել» Սիրիայում, սակայն դեռ կփորձի գործել երկրում։ Նրա ելույթի ձայնագրությունը հրապարակել է Abdi Media-ն, որին ուշադրություն է դարձրել The New York Times-ը (NYT):

Պարբերականի համաձայն՝ գեներալն անցյալ շաբաթ ելույթ է ունեցել Թեհրանի մզկիթներից մեկում։ Ըստ հրապարակման՝ նրա ելույթը «կտրուկ հակասում է» Իրանի ղեկավարության հայտարարություններին, որոնք «շաբաթներ շարունակ փորձել են նվազեցնել ռազմավարական կորուստների մասշտաբները» Սիրիայում։ Էսբաթին մեղադրել է Ռուսաստանին իր պնդումներով Իրանին մոլորության մեջ գցելու համար, թե «ռուսական ինքնաթիռները ռմբակոծում էին սիրիացի ապստամբների դիրքերը, երբ իրականում նրանք ռումբեր էին նետում բաց դաշտերում»։

2024 թվականին, երբ Իսրայելը հարվածներ էր հասցնում Սիրիայում իրանական օբյեկտներին, Ռուսաստանն «անջատել է ռադարները՝ արդյունավետորեն նպաստելով այդ հարձակումներին», ասել է իրանցի գեներալը։

Նա նաև հավելել է, որ Իրանի հարաբերությունները Սիրիայի նախագահ Բաշար Ասադի հետ լարված են եղել նրա հրաժարականին նախորդող ամիսներին:

«Չեմ կարծում, որ Սիրիայի կորուստը հպարտանալու բան է։ Մենք պարտություն կրեցինք, և պարտությունը շատ ուժեղ էր։ Շատ ուժեղ հարված ստացանք, և դա շատ դժվար էր»,- ասել է Բեհրուզ Էսբաթին:

Հիշեցնենք՝ «Հայաթ Թահրիր ալ-Շամ» խմբավորումը դեկտեմբերին տապալեց Բաշար Ասադի իշխանությունը։ Վերջինն ընտանիքի հետ ապաստանել է Ռուսաստանում։

Թարգմանությունը՝ Տաթև Ֆռանգյանի