Հարավային Կորեայի նախագահը բարիկադավորվել է իր առանձնատանը․ նրան ձերբակալելու երկրորդ փորձը կարվի

Հարավային Կորեայի իշխանությունները պատրաստվում են իմփիչմենթի ենթարկված նախագահ Յուն Սոկ Յոլին ձերբակալելու երկրորդ փորձին։ Պետության ղեկավարը, սակայն, անտեսել է քննական մարմնի ծանուցումը և բարիկադավորվել իր առանձնատանը, գրում է Reuters գործակալությունը։

Նախագահի անվտանգության ծառայությունն ամրացրել է համալիրը փշալարերով և բարիկադներով՝ օգտագործելով ավտոբուսներ՝ արգելափակելու մուտքը դեպի բլրի լանջին գտնվող առանձնատուն, որտեղ, ենթադրաբար, պահվում է Յուն Սոկ Յոլը՝ անտեսելով հարցաքննության ծանուցումը:

Կոռուպցիայի հետաքննության գրասենյակի (CIO) ղեկավարը Օ Դոնգ Վոնը, որը ղեկավարում է նախագահի գործով հետաքննությունը, ներողություն է խնդրել անցյալ ուրբաթ նախագահական համալիրում վեց ժամ տևած լարված ընդհարումից հետո ձերբակալության ձախողված փորձի համար: Նա չեղարկել է ձերբակալության փորձը այն բանից հետո, երբ նախագահական համալիրի մուտքն արգելափակվել է մարդկային շղթայով։

Միաժամանակ, պաշտոնյան խոստացել է «հասնել նպատակին՝ այս անգամ զգույշ, մեծ վճռականությամբ պատրաստվելով, որպեսզի հրամանի երկրորդ կատարումը լինի վերջինը»։

Ձերբակալման տարբեր սցենարներ, որոնց մասին հաղորդում են տեղական լրատվամիջոցները, ներառում են ոստիկանության հատուկ մարտավարական ստորաբաժանումների և ծանր տեխնիկայի մոբիլիզացում՝ «բարիկադները ճեղքելու համար, որից հետո ավելի քան 2000 ոստիկաններ դուրս են մղելու նախագահական գվարդիան, ինչը կարող է տևել մինչև երեք օր, եթե անհրաժեշտ լինի՝ ուժասպառ անելով նախագահական գվարդիայի գործակալներին»։

Թարգմանությունը՝ Տաթև Ֆռանգյանի