25.05.2026 | 23:41
Գյումրիի արտահերթ ընտրություններ ենք իրականացնելու. Նիկոլ Փաշինյան. ՏԵՍԱՆՅՈՒԹ
Կալանավորված լրագրողների թվով Ադրբեջանը Եվրոպայում առաջին հնգյակում է
Քաղաքականություն
07.01.2025 | 23:19
Ադրբեջանը եվրոպական այն հինգ երկրներից մեկն է, որտեղ ամենաշատ լրագրողներն են կալանավորվել։ Այս մասին ասվում է Լրագրողների միջազգային ֆեդերացիայի (IFJ) տարեկան զեկույցում, որի տվյալները մեջբերում է ադրբեջանական Թուրան գործակալությունը։
Հետազոտության համաձայն՝ 2024 թվականին ամբողջ աշխարհում ձերբակալվել է 516 լրագրող։ Նախորդ տարիների համեմատ՝ կտրուկ աճ է գրանցվել․ 2023-ին ձերբակալվել էր 427, 2022-ին՝ 375 լրագրող։
Չինաստանը շարունակում է մնալ լրագրողների ամենամեծ բանտը, որտեղ 135 լրատվամիջոցների աշխատակից է ազատազրկված: Նրան հաջորդում են Իսրայելը՝ 59 պաղեստինցի լրագրողներով, Մյանման՝ 44 լրագրողով։
Ներկայում Ադրբեջանի բանտերում 25 լրագրողներ կան, մեկ այլ ադրբեջանցի լրագրող՝ Աֆղան Սադիգովը, Բաքվի պահանջով ձերբակալվել է Վրաստանում։
Եվրոպայում կալանավորված լրագրողների թվով Ադրբեջանը Ռուսաստանի (38), Բելառուսի (30), Ուկրաինայի (28) և Թուրքիայի (20) հետ միասին առաջին հնգյակում է։
Միաժամանակ, նշվում է, որ 2024 թվականին աշխարհում սպանվել է 122 լրագրող և լրատվամիջոցների աշխատակից, որոնցից 14-ը կանայք են։
Ֆեդերացիան նախորդ տարին գնահատել է որպես լրագրողների համար ամենամահաբերներից մեկը: Զեկույցի համաձայն՝ Մերձավոր Արևելքում և արաբական աշխարհում սպանվել են 77 լրագրողներ, Աֆրիկայում՝ լրատվամիջոցների 10 աշխատակիցներ, Ամերիկայում՝ 9, Եվրոպայում՝ 4։
Թարգմանությունը՝ Էմմա Չոբանյանի
