Քաղաքականություն
06.01.2025 | 14:53
ԱՄՆ-ի տարածքի զգալի մասում ձյան առատ տեղումներ են։ Կանզասից մինչև Նյու Ջերսի ձնաբքի մասին նախազգուշացում է տրվել ավելի քան 60 միլիոն մարդու։ «Արմենպրես»-ի հաղորդմամբ՝ այս մասին հայտնում է «Reuters»-ը։
FlightAware կայքի տվյալներով՝ հարյուրավոր չվերթներ չեղարկվել են․ միայն Կանզաս Սիթիի և Սենթ Լուիսի օդանավակայաններում 275 չվերթ է չեղարկվել։ Կանզասի, Կենտուկիի, Արկանզասի, Արևմտյան Վիրջինիայի և Վիրջինիայի նահանգապետներն արտակարգ դրություն են հայտարարել։
Ազգային օդերևութաբանական ծառայության հաղորդմամբ՝ Կանզասում և Միսսուրիի հյուսիս-արևմուտքում եղանակային անբարենպաստ պայմանների պատճառով ճանապարհներին տեսանելիությունը շատ ցածր է։ Կանզասի միջպետական 70 մայրուղին ամբողջությամբ փակվել է ձյան և մերկասառույցի պատճառով։ Միսսուրիի նահանգային ոստիկանությունը 50 մղոն երկարությամբ փակված հատվածներում որոնողական աշխատանքներ է կատարում՝ արգելափակված վարորդներին գտնելու համար։ Վերջին տվյալներով՝ հայտնաբերվել է մոտ 600 արգելափակված վարորդ, արձանագրվել է 285 վթար։
Ակնկալվում է, որ Հարավային Օհայոյից մինչև Վաշինգտոն կտեղա 15-ից 30 սմ ձյուն։ Արկանզասում, Լուիզիանայում, Միսիսիպիում և Ալաբամայում ուժեղ ամպրոպներ են գրանցվել, չի բացառվում տորնադոների առաջացումը։
Օդերևութաբանական ծառայությունը նախազգուշացնում է, որ տեղումների դադարից հետո հունվարի 6-ից արկտիկական սառը օդային զանգվածներ կներթափանցեն։
