Հայաստանի շախմատի տղամարդկանց հավաքականը ՖԻԴԵ-ի կողմից ճանաչվել է 100-ամյակի լավագույն թիմ

Հայաստանի շախմատի տղամարդկանց հավաքականը շախմատի միջազգային ֆեդերացիայի՝ ՖԻԴԵ-ի կողմից ճանաչվել է 100-ամյակի լավագույն թիմ․ հայտնում են Հայաստանի շախմատի ֆեդերացիայից։

«Հայաստանի շախմատի տղամարդկանց հավաքակամը լավագույն թիմ է ճանաչվել նաև ՀՀ կրթության, գիտության, մշակույթի և սպորտի նախարարության կողմից կազմակերպված «Սպորտի ոլորտում տարվա լավագույնների ընտրություն» մրցույթում:

Հունիսի 1-ից 14-ը Հնդկաստանում անցկացված շախմատի աշխարհի մինչև 20 տարեկան պատանիների և աղջիկների առաջնությունում գրոսմայստեր Էմին Օհանյանը և կանանց միջազգային վարպետ Մարիամ Մկրտչյանը դարձան փոխչեմպիոններ:

Հունիսի 20-ից 28-ը Հունաստանում անցկացված շախմատի Եվրոպայի մինչև 18 տարեկան պատանիների թիմային առաջնությունում Հայաստանի թիմը դարձավ փոխչեմպիոն:
Թիմի անդամներն էին՝
– ՄԳ Էմին Օհանյան
– ՄՎ Արսեն Դավթյան
– ՖՎ Ռոբերտ Փիլիպոսյան
– ՖՎ Էրիկ Գասպարյան
– ՖՎ Բենիկ Ագասարով

Հուլիսի 19-ից 28-ը Հայաստանում անցկացված Ֆիզիկական հաշմանդամություն ունեցող անձանց շախմատի աշխարհի անհատական առաջնությունում ՖԻԴԵ-ի վարպետ Սարգիս Սարգսյանը դարձավ բրոնզե մեդալակիր:

Օգոստոսի 17-ից 18-ը Չեխիայում անցկացված Եվրոպայի պատանիների արագ շախմատի առաջնությունում ՖԻԴԵ-ի վարպետ Ալեքս Սահակյանը դարձավ մինչև 18 տարեկան պատանիների չեմպիոն, իսկ Սոֆիա Բաղրամյանը՝ մինչև 8 տարեկան աղջիկների բրոնզե մեդալակիր:

Օգոստոսի 19-ից 20-ը Չեխիայում անցկացված Եվրոպայի պատանիների կայծակնային շախմատի առաջնությունում Սոնա Կրկյաշարյանը դարձավ մինչև 14 տարեկան աղջիկների չեմպիոն, իսկ Սոֆիա Բաղրամյանը՝ մինչև 8 տարեկան աղջիկների չեմպիոն:

Օգոստոսի 22-ից 31-ը Չեխիայում անցկացված շախմատի Եվրոպայի պատանիների առաջնությունում միջազգային վարպետ Արսեն Դավթյանը դարձավ մինչև 18 տարեկան պատանիների փոխչեմպիոն, ՖԻԴԵ-ի վարպետ Բենիկ Ագասարովը դարձավ մինչև 16 տարեկան պատանիների փոխչեմպիոն, իսկ վարպետի թեկնածու Տիգրան Համբարձումյանը՝ մինչև 12 տարեկան պատանիների փոխչեմպիոն:

Սեպտեմբերի 10-ից 23-ը Հունգարիայում անցկացված շախմատի համաշխարհային 45-րդ օլիմպիադայում Հայաստանի տղամարդկանց հավաքականը կիսել է 2-6-րդ հորիզոնականները, իսկ կանանց հավաքականը՝ 3-6-րդ: Գրոսմայստեր Էլինա Դանիելյանը և միջազգային վարպետ Աննա Սարգսյանը համապատասխանաբար 3-րդ և 4-րդ խաղատախտակների վրա դարձան բրոնզե մեդալակիրներ:

Նոյեմբերի 7-ից 20-ը Մոնտենեգրոյում անցկացված շախմատի Եվրոպայի անհատական առաջնությունում գրոսմայստեր Ռոբերտ Հովհաննիսյանը նվաճեց աշխարհի գավաթի ուղեգիր»,- նշված է հաղորդագրությունում։